Шпаргалкі на вусцілках і ў батоне — выкладчык сабраў калекцыю найлепшых студэнцкіх шпаргалак і выставіў яе ў вузе
Больш за 15 гадоў выкладчык вышэйшай матэматыкі Аляксандр Гальмак калекцыяніраваў шпаргалкі, канфіскаваныя ў студэнтаў. І цяпер яго ўнікальная калекцыя стала публічнай. У музеі Беларускага дзяржаўнага ўніверсітэта харчовых і хімічных тэхналогій адкрылася яго выстава.
Сваю першую шпаргалку Аляксандр Гальмак канфіскаваў у студэнта яшчэ ў 80-х. Малады і прынцыповы педагог быў бязлітасны: знаходка аўтаматычна азначала «нездавальняюча». Гэтым правілам Аляксандр Міхайлавіч кіруецца і сёння, распавядае СТБ.
«Апошнім часам я заўсёды папярэджваю. Вы маеце права рабіць шпаргалкі, але я маю права, як выкладчык, злавіць. Але тады — усё, «двойка», — кажа выкладчык Беларускага дзяржаўнага ўніверсітэта харчовых і хімічных тэхналогій.
За 45 гадоў працы ва ўніверсітэце ён выявіў сотні шпаргалак. Ад банальных «гармошак» да сапраўдных інжынерных твораў, якія нават рука не падымалася выкінуць. Гэтыя ўзоры студэнцкай вынаходлівасці ён пачаў калекцыяніраваць. Сакрэты некаторых хітрамудрых прыстасаванняў даводзілася раскрываць разам з іх аўтарамі.
Куды толькі не хавалі падказкі студэнты: у бутэлькі з вадой, футляры для акуляраў, заліковыя кніжкі і нават ва ўпакоўкі ад лекаў.
Формуламі распісвалі вусцілкі, спрабавалі пранесці шпаргалкі нават у батоне ці ў шакаладцы. Але дасведчанае вока выкладчыка было пільным. Асаблівую ўвагу педагога прыцягвалі ідэальна напісаныя работы. Гэта быў пэўны сігнал: падказка недзе побач. Так, падчас пандэміі была выкрыта медыцынская маска з формуламі.
Аляксандр Міхайлавіч упэўнены: з развіццём тэхналогій фантазія студэнтаў пачала знікаць. Спісаць з тэлефона ці «разумнага» гадзінніка — самае простае і, на яго думку, асуджанае на правал рашэнне.
Цяпер чытаюць
Ціханоўскі патлумачыў, чаму ён так паводзіў сябе ў Нью-Ёрку43
Каментары