Як выехаць з Беларусі ў Еўропу і вярнуцца назад, калі мяжа з Літвой закрытая? Спойлер: варыянтаў не шмат

Латвія — добры варыянт, але з нюансамі

Найбліжэйшы пункт пропуску ад Каменнага Логу і Беняконяў знаходзіцца ў Латвіі. Ад Вільні да Патэрніекаў — каля 270 кіламетраў.

Але хутка выехаць з ЕС праз Латвію не атрымаецца. Ад 1 верасня дзейнічаюць новыя правілы ўезду ў Латвію. Замежнік абавязаны запоўніць анкету не пазней як за 48 гадзін да перасячэння мяжы. Калі анкеты не будзе — тэарэтычна можа чакаць штраф да 2000 еўра і дэпартацыю. Гэта датычыцца ў тым ліку транзіту па тэрыторыі Латвіі пры заездзе з Эстоніі і Літвы.

Пры гэтым трэба ўлічваць, што прынамсі частка аўтобусаў з Латвіі ехала праз Літву, як, напрыклад, маршрут Рыга — Мінск ад Ecolines.

Павялічыць

У Мінсктранса ёсць адзін з аўтобусаў, які едзе з Мінска ў Рыгу, абмінаючы Літву, — праз Верхнядзвінск і Даўгаўпілс (Дзвінск).

Сярод рэйсаў, якія яшчэ едуць праз беларуска-латвійскую мяжу —Рыга-Гомель. Едзе ён праз Даўгаўпілс (Дзвінск), Полацк, Віцебск, Оршу і Магілёў.

Павялічыць

Дабрацца з Даўгаўпілса ў Полацк можна ўсяго за 41 еўра.

Для тых, хто захрас у Літве на аўто, трэба ведаць два моманты. Першы — пазітыўны. Калі пасля запуску электроннай чаргі выехаць з Латвіі ў Беларусь было магчыма не раней чым праз тыдзень, то па стане на раніцу 27 кастрычніка свабодныя акенцы ёсць на выезд у той жа дзень.

Павялічыць

Калі раней на суткі было 55 слотаў, то цяпер — амаль 150.

Другая важная акалічнасць заключаецца ў тым, што ў Латвіі працягвае дзейнічаць поўная забарона на праезд аўто з беларускімі нумарамі. Таму запоўніць за 48 гадзін анкету і без чаргі выехаць праз Латвію могуць не ўсе.

Карацей, трапіць з Беларусі ў Латвію на аўто можна без чаргі — галоўнае, каб машына не была на беларускай або расійскай рэгістрацыі.

Польшча

Ад Вільні да польскага Тарэспаля — каля 550 кіламетраў, але менавіта гэты доўгі маршрут можа стаць самым хуткім шляхам для вяртання ў Беларусь.

У Польшчы няма ні забароны на праезд на аўто з беларускімі нумарамі, ні анкет, якія трэба запаўняць загадзя, ні электроннай чаргі. Па стане на 9:30 раніцы ў чарзе на выезд з Польшчы ў Беларусь было каля 10 машын.

Білеты на аўтобус з Варшавы да Брэста каштуюць каля 100—120 рублёў, з Варшавы ў Мінск — ад 130 рублёў, а з Беластока ў Гродна — каля 150 рублёў. Таму варыянтаў, як вярнуцца праз Польшчу, хапае — роўна як і дабрацца з Беларусі ў Польшчу.

Па стане на раніцу 27 кастрычніка ў чарзе на выезд з Беларусі ў Польшчу стаяць 20 аўтобусаў і амаль 800 легкавікоў. Трапіць у Польшчу аўтобусам можна менш чым праз суткі, а на аўто праз гадін 25-30, паколькі за суткі праз мяжу праязджае каля 650‑750 легкавых аўто.

У электроннай чарзе на выезд у Літву стаіць 100 легкавых у Беняконях і 180 у Каменным Лозе, а таксама 1600 грузавікоў (750 Беняконі, 850 Каменны Лог).

Калінінград 

Трапіць у Еўрасаюз і вярнуцца назад у Беларусь можна і праз Расію.

Бліжэйшыя білеты на цягнік да Калінінграда можна набыць з выездам а 21:57 з Мінска, а ў 8:30 цягнік прыбывае ў Калінінград.

Павялічыць

Білеты каштуюць ад 283 рублёў. Выйсці з цягніка на тэрыторыі Літвы нельга, таму ў любым выпадку давядзецца ехаць да Калінінградскай вобласці — можна да Несцерава ці Чарняхоўска, — а ўжо адтуль дабірацца да Літвы або Польшчы.

Аўтобус паміж Вільняй і Калінінградам курсіруе два-тры разы на тыдзень. Білеты каштуюць каля 80 еўра. Калі дабірацца перакладнымі, то будзе танней, але і часу гэта зжарэ нямала.

Паміж Варшавай і Калінінградам аўтобус у Ecolines курсіруе штодня. Білеты па 64 еўра.

Цэны на плацкарту з Калінінграда ў Мінск пачынаюцца ад 320 рублёў, выехаць з Калінінграда можна хоць сёння.

Можна нават самалётам, але зноў праз Калінінград

Тройчы на тыдзень ёсць рэйс Мінск — Калінінград. Бліжэйшыя білеты ёсць на вылет з Мінска 31 кастрычніка. Кошт — 732 рубля. На вылет 1 лістапада — 455 рублёў. Час палёту — 2:45.

• 3
• 1
• 2
• 7
• 2
• 6
• 0
• 0