«Ад маскалёў і для маскалёў. А вы думалі, што для беларусаў зробяць?» У цэнтры Мінска адкрылася «Дранічная №1»

Месціцца «Дранічная №1» у самым цэнтры беларускай сталіцы — вуліца Камсамольская, 7. Раней на гэтым месцы быў бар «Віно рытмы гараджане», які працаваў каля двух гадоў. Фудблогер Какабай нахвальваў той бар, маўляў, нарэшце зрабілі не з «гаўна і палак», але прызнаваў, што цэны там не вельмі бюджэтныя.

Час пакажа, наколькі паспяховай будзе «Дранічная №1». Абмяркоўваць рэстаран у сацыяльных сетках пачалі яшчэ да афіцыйнага адкрыцця.

Павялічыць

Прыняць першых наведнікаў тут вырашылі 7 лістапада. Можна падумаць, што выпадкова — але не. Савецкі вайб — гэта частка канцэпцыі. У кафэ граюць песні той эпохі.

Пры гэтым на рэкламе рэстарана — дзве гламурныя дзяўчыны ў хустачках і акулярах (шмат у каго з беларусаў яны выклікалі асацыяцыі з дзяўчатамі з маскоўскіх Патрыкаў, Патрыяршых прудоў), якія трымаюць у руках па драніку.

Павялічыць

Слоган рэстарана — «хруст пад чарачкі». На гэта ў Treads звярнула ўвагу беларуская дызайнерка Саша Солава: «Сачыла за навінамі аб адкрыцці «Дранічнай №1». Ніяк не магла пазбыцца адчування, што не нашае гэта. І не памылілася. А слоган «пад чарачкі» на шыльдзе на ўваходзе канчаткова развеяў сумневы — беларусы так не кажуць».

І каментатары з ёй пагадзіліся: «Маскоўская, так бы мовіць, эстэтыка — ад маскалёў і для маскалёў. А вы думалі, што для беларусаў зробяць?», «Трэба было назваць: «Драничная №1 в Белоруссии», так адпалі б усе пытанні».

А самы папулярны каментар, які набраў амаль 800 лайкаў, такі: «Дранікі ядуць з мачанкай, са смятанай, са скваркамі. Але вось як закусь пад гарэлку — ну няма ў беларусаў такой гастранамічнай звычкі. Зноў жа, пазіцыянаваць сваю ўстанову як чарговую бухалаўку — такое сабе маркетынгавае рашэнне. Я люблю дранікі, але ў такое месца з такім пазіцыянаваннем ніколі б не пайшоў».

Павялічыць

Тым не менш на недахоп наведвальнікаў рэстаран пакуль паскардзіцца не можа — у дзень адкрыцця на ўваходзе стаяла чарга. А ў інстаграме «Дранічнай №1» пахваліліся, што за першы дзень іх госці з'елі 60 кілаграмаў бульбы.

У меню — розная ежа, але пададзеная на драніках. У «Дранічнай № 1» можна пакаштаваць як «Аліўе» на драніку, так і дранік з марожаным і карамеллю.

Цэны тут такія: самі дранікі каштуюць ад 3,5 рубля за штуку да 15,5 за пяць штук. А наверх можна дадаваць тое, што хочацца. Напрыклад, тартар з ялавічыны з сырным мусам каштуе 20 рублёў, кураня з грыбамі ў соусе з блакітнага сыру — 15. Самы дарагі дадатак — чорная ікра. За яе давядзецца даплаціць ажно 160 рублёў.

Павялічыць

З першых страваў ёсць боршч за 17 рублёў і суп дня за 12 рублёў. Салата на драніку каштуе ад 14 да 17 рублёў. А той самы дранік з марожаным — 14 рублёў.

Адна з саўладальнікаў «Дранічнай № 1» — Юлія Юдчыц. Яна таксама сузаснавальніца такіх месцаў як «МонеМане», «Леоне», «Легендар», Embargo і аперацыйная дырэктарка рэстараннай групы кампаній U-sun.

Юлія сцвярджае, што новы рэстаран «для тых, хто любіць Беларусь: смачна, гучна і па-сапраўднаму».

• 4
• 27
• 4
• 51
• 1
• 0
• 7
• 0