Міністр замежных спраў Літвы абмеркаваў беларускае пытанне з Джонам Коўлам
10 лістапада міністр замежных спраў Літвы Кястуціс Будрыс у Вашынгтоне сустрэўся з нядаўна прызначаным спецыяльным пасланнікам ЗША па справах Беларусі Джонам Коўлам. Пра вынікі гэтай сустрэчы паведаміла прэс-служба літоўскага МЗС.
Падчас сустрэчы Кястуціс Будрыс адзначыў, што, нягледзячы на захады, прынятыя Літвой і міжнароднай супольнасцю, беларускі рэжым працягвае гібрыдныя атакі супраць Літвы, чым стварае пагрозу бяспецы міжнароднай авіяцыі і павышае напружанасць у рэгіёне. Таму, паводле міністра, неабходна ўзмацняць ціск на рэжым і пашыраць санкцыі.
Таксама Будрыс паведаміў амерыканскаму дыпламату пра працяглыя парушэнні паветранай прасторы метэаралагічнымі шарамі і плыні нелегальнай міграцыі, падкрэсліўшы, што дзеянні Беларусі носяць наўмысны і варожы характар. Ён таксама падзякаваў ЗША за падтрымку і салідарнасць у сітуацыі з гібрыднымі атакамі з боку Беларусі.
Акрамя таго, бакі абмеркавалі ролю Беларусі ў падтрымцы расійскай агрэсіі супраць Украіны.
Каментары