З-за прэтэнзій Трампа на Грэнландыю ў дацкім урадзе з’явіўся асаблівы начны вартаўнік
Ён павінен падняць трывогу, калі нешта пачнецца.
На шостым паверсе Міністэрства замежных спраў Даніі штовечар да адказнай працы прыступае дзяжурны «начны вартаўнік». Яго змена доўжыцца з 17 да 7 гадзін, піша Bild.
Гэты супрацоўнік павінен збіраць палітычныя навіны з ЗША, ацэньваць іх і раніцай здаваць справаздачу. На выпадак начнога дыпламатычнага інцыдэнту або іншых раптоўных падзей маецца спіс экстранных нумароў, каб дзяжурны мог неадкладна паведаміць ураду.
Кур’ёзнае начное дзяжурства ўвялі ў пачатку года пасля заяў прэзідэнта ЗША Дональда Трампа пра тое, што ён не выключае анексіі Грэнландыі ваенным шляхам. Каб супрацоўнікам урада ў Капенгагене з-за розніцы ў часе не трэба было па начах правяраць, што там у навінах, і спатрэбіўся вартаўнік.
ЗША да гэтага часу не забыліся пра Грэнландыю
Данія і ЕС заўсёды адхілялі намеры Трампа далучыць Грэнландыю да ЗША. Сама Грэнландыя таксама не праяўляе цікавасці да гэтай ідэі. Трамп цяпер устрымліваецца ад публічных заяў на гэты конт, аднак, паводле даных Politiken, Белы дом па-ранейшаму імкнецца пашырыць свой уплыў на востраве і ўстанавіць прамыя кантакты з яго аўтаномным урадам (то-бок у абыход Капенгагена).
Прэм'ер-міністр Даніі Метэ Фрэдэрыксен нядаўна заявіла ў парламенце: «Магчыма, некаторыя адчуваюць, што мы можам уздыхнуць з палёгкай. Але я лічу: мы не можам».
Яна дадала, што насельніцтва Грэнландыі па-ранейшаму жыве ў страху перад анексіяй. Начному дзяжурнаму ў МЗС, верагодна, і далей будзе хапаць працы.
Мінчанка Ангеліна, якая прасіла ў Лукашэнкі кватэру за тройню, атрымала жыллё18
Каментары