Z-za pretenzij Trampa na Hrenłandyju ŭ dackim uradzie źjaviŭsia asablivy načny vartaŭnik
Jon pavinien padniać tryvohu, kali niešta pačniecca.
Na šostym paviersie Ministerstva zamiežnych spraŭ Danii štoviečar da adkaznaj pracy prystupaje dziažurny «načny vartaŭnik». Jaho źmiena doŭžycca z 17 da 7 hadzin, piša Bild.
Hety supracoŭnik pavinien źbirać palityčnyja naviny z ZŠA, aceńvać ich i ranicaj zdavać spravazdaču. Na vypadak načnoha dypłamatyčnaha incydentu abo inšych raptoŭnych padziej majecca śpis ekstrannych numaroŭ, kab dziažurny moh nieadkładna paviedamić uradu.
Kurjoznaje načnoje dziažurstva ŭviali ŭ pačatku hoda paśla zajaŭ prezidenta ZŠA Donalda Trampa pra toje, što jon nie vyklučaje anieksii Hrenłandyi vajennym šlacham. Kab supracoŭnikam urada ŭ Kapienhahienie z-za roźnicy ŭ časie nie treba było pa načach praviarać, što tam u navinach, i spatrebiŭsia vartaŭnik.
ZŠA da hetaha času nie zabylisia pra Hrenłandyju
Danija i ES zaŭsiody adchilali namiery Trampa dałučyć Hrenłandyju da ZŠA. Sama Hrenłandyja taksama nie prajaŭlaje cikavaści da hetaj idei. Tramp ciapier ustrymlivajecca ad publičnych zajaŭ na hety kont, adnak, pavodle danych Politiken, Bieły dom pa-raniejšamu imkniecca pašyryć svoj upłyŭ na vostravie i ŭstanavić pramyja kantakty ź jaho aŭtanomnym uradam (to-bok u abychod Kapienhahiena).
Premjer-ministr Danii Miete Frederyksien niadaŭna zajaviła ŭ parłamiencie: «Mahčyma, niekatoryja adčuvajuć, što my možam uzdychnuć z palohkaj. Ale ja liču: my nie možam».
Jana dadała, što nasielnictva Hrenłandyi pa-raniejšamu žyvie ŭ strachu pierad anieksijaj. Načnomu dziažurnamu ŭ MZS, vierahodna, i dalej budzie chapać pracy.
Ciapier čytajuć
U rasijskaj armii biełaruskaha najomnika paviesili na drevie ŭniz hałavoj i bili pałkaj pa hienitalijach14
Kamientary