З’явіўся анлайн-даведнік па напісанні і вымаўленні назваў беларускіх населеных пунктаў
У Беларусі — больш за 23 тысячы населеных пунктаў. Далёка не заўсёды зразумела, як правільна вымаўляецца і пішацца назва таго ці іншага. І калі шматпакутны Лунінец адораны націскам у Вікіпедыі, то з вёскай на дзясятак дамоў могуць узнікнуць пытанні. Каб гэта выправіць, Ігар Палынскі з калегамі стварыў адмысловы анлайн-даведнік, піша «Будзьма».
На гэты момант у даведніку можна знайсці, як пішуцца назвы населеных пунктаў нашай краіны па-беларуску (з націскамі!) і па-руску, альтэрнатыўныя варыянты назваў (калі яны ёсць), а таксама даведацца, дзе знаходзяцца населеныя пункты і як скланяюцца іх назвы.
Па словах Ігара Палынскага, ёсць яшчэ ідэі апісаць іх паходжанне, дадаць каардынаты.
«Некаторыя крыніцы інфармацыі ёсць, мы займаемся іх упарадкаваннем. Могуць быць недакладнасці — арыгінальная база досыць старая, але мы ловім і выпраўляем блохі, дадаём даныя, якія нам дасылаюць (пакуль асабіста, але прыкруцім магчымасць рабіць гэта праз сайт)», — піша Ігар Палынскі на сваёй старонцы ў Фэйсбуку.
Для анлайн-даведніка набылі адмысловы дамен bielarus.live.
Таксама адзначаецца, што ўся наяўная на гэты момант інфармацыя ў анлайн-даведніку — на падставе даведніка Валянціны Лемцюговай, а таксама з граматычнай базы Інстытута мовазнаўства НАН Беларусі.
Цяпер чытаюць
У Мінску кідаюць будаваць трэцюю лінію метро ў Зялёны Луг. Усе сілы пойдуць на чацвёртую, кальцавую10
Каментары
Змены ў н.п. ёсць, пераважна знікненне.
Так што альтэрнатыўная версія не замінае. Пры гэтым насцярожвае выпраўленне памылак па запытах карыстальнікаў. Калі гэта апіскі, то нармальна, а калі нешта іншае, то залежыць ад тыпа памылкі, можа быць неадназначным рашэннем.