На фоне блакіроўкі расійскіх тэрміналаў «Старлінк» украінцы вызвалілі больш за 300 кв. км, восем населеных пунктаў.
Дэсантна-штурмавыя войскі Украіны паведамілі пра контрнаступальную аперацыю на Аляксандраўскім кірунку.
Групоўка спрабуе стрымаць далейшае прасоўванне расійскай арміі ў Днепрапятроўскай і Запарожскай абласцях і выціснуць яе за межы адміністрацыйнай мяжы Днепрапятроўскай вобласці.
З пачатку контрнаступу групоўка Дэсантна-штурмавых войскаў разам з сумежнымі падраздзяленнямі вызваліла больш за 300 кв. км, восем населеных пунктаў.
«Пакуль трывае актыўная фаза аперацыі, казаць пра канчатковыя яе вынікі крыху заўчасна», — адзначаюць вайскоўцы.
Раней прэзідэнт Украіны Уладзімір Зяленскі расказваў пра вызваленне 300 кв. км на фоне блакіроўкі расійскіх тэрміналаў «Старлінк».
Таксама афіцэр Узброеных Сіл Украіны Андрэй Ткачук паведамляў пра ўдалы контнаступ на поўдні — у кірунку населеных пунктаў Паўлаўка, Успенаўка і Цярнаватае Запарожскай вобласці. Удалося гэта дзякуючы блакаванню «Старлінк» для расецаў на фронце і падрыхтоўцы ўкраінскіх вайскоўцаў, адзначаў афіцэр у каментары тэлеканалу «Мы — Украіна».
Пра контрнаступленне ў Днепрапятроўскай вобласці паведамлялі і аналітыкі DeepState. Тады казалася, што ўкраінская армія адкінула расійскія войскі каля Каліноўскага і ў Цярновым.
Цяпер чытаюць
Мужчына ў мінскім метро лапаў дзяўчат, з выгляду падлеткаў, і паказваў ім пахабныя жэсты. Яго затрымалі6
Каментары