Гэтая амерыканская актрыса здымалася ў папулярных падлеткавых камедыях 2000-х. Але цяпер яе не пазнаць
Яе называлі ідэальнай гераіняй падлеткавых камедый, а фільмы з яе ўдзелам глядзелі мільёны. У пачатку 2000‑х Аманда Байнс увасабляла галівудскую мару — юная, абаяльная, паспяховая. Сёння многія былыя прыхільнікі з цяжкасцю пазнаюць яе.
Аманда Байнс нарадзілася 3 красавіка 1986 года ў Каліфорніі ў сям’і стаматолага і медыцынскай асістэнткі. Яна была малодшай з трох дзяцей.
Вядомасць прыйшла да яе яшчэ ў падлеткавым узросце — дзякуючы шоу All That і ўласнай праграме The Amanda Show на канале Nickelodeon. Неўзабаве Аманда стала адной з самых папулярных маладых тэлезорак ЗША.
У 2000‑я актрыса паспяхова перайшла ў вялікае кіно. Яна атрымала шырокую вядомасць дзякуючы ролям у фільмах «Чаго хоча дзяўчына» (What a Girl Wants, 2003), «Яна — хлопец» (She’s the Man, 2006), «Лак для валасоў» (Hairspray, 2007) і «Выдатніца лёгкіх паводзін» (Easy A, 2010).
У 2006 годзе часопіс Teen People уключыў Аманду Байнс у спіс 25 самых прывабных маладых знакамітасцяў ва ўзросце да 25 гадоў. А ўжо ў наступным годзе выданне Forbes адзначыла яе ў рэйтынгу пяці самых высокааплатных зорак да 21 года, ацаніўшы гадавы даход актрысы ў 2,5 мільёна долараў.
Але ў 2010 годзе Аманда нечакана абвясціла пра сыход з кіно. Пазней стала зразумела, што за гэтым стаялі сур’ёзныя асабістыя праблемы. Байнс усё часцей з’яўлялася ў навінах не з-за прэм’ер, а праз інцыдэнты з законам і праблемы з псіхічным здароўем. У 2013 годзе пасля шэрагу крызісаў яна была шпіталізаваная.
Тады ж па рашэнні суда дзяўчына апынулася пад апекай: кантроль над фінансамі і часткай жыццёвых рашэнняў ажыццяўляла яе маці. У 2022 годзе апека была скасаваная.
Што здарылася?
У 2018 годзе Аманда дала вялікае інтэрв’ю часопісу Paper. Яна прызналася, што яшчэ падчас здымак у фільме «Лак для валасоў» пачала ўжываць адэрал — прэпарат, які выкарыстоўваецца для лячэння сіндрому дэфіцыту ўвагі і гіперактыўнасці (СДВГ), а таксама наркалепсіі (разладу сну). Паводле слоў актрысы, у нейкім часопісе яна прачытала, што адэрал прымаюць жанчыны, каб заставацца худымі. Імітуючы сімптомы СДВГ, яна звярнулася да псіхіятра і атрымала рэцэпт.
Актрыса згадвае, што ўжывала прэпарат жменямі, і гэта паўплывала на яе паводзіны на здымачнай пляцоўцы фільма «Тыдзень бясшлюбнасці» (Hall Pass) вясной 2010 года. Яна была рассеяная, не магла засяродзіцца на сваіх рэпліках і запомніць іх. У выніку карціну выпусцілі без яе ўдзелу. Да таго ж ёй зусім не падабаўся яе знешні выгляд.
Пасля сыходу з акцёрскай прафесіі, паводле слоў Байнс, яна адчула сябе згубленай, бо адмовілася ад справы, якой фактычна прысвяціла ўсё жыццё.
«У мяне было шмат вольнага часу, я прачыналася, адразу ўжывала марыхуану і літаральна заставалася пад яе ўздзеяннем увесь дзень», — казала яна.
Прыкладна ў той жа перыяд, паводле яе слоў, яна пачала «мець зносіны з больш сумнеўнай кампаніяй і моцна ізалявалася… Я вельмі ўцягнулася ў ужыванне наркотыкаў, і гэта стала для мяне вельмі цёмным і сумным светам».
Той этап свайго жыцця яна апісвае так: «Я проста сядзела дома, была пад кайфам, глядзела тэлевізар і пісала ў твітары».
У лістападзе 2018 года Аманда паведаміла журналістам, што адзначыла чатыры гады цвярозасці, падкрэсліўшы, што значнай часткай свайго поспеху абавязаная падтрымцы і клопату бацькоў. Аднак, як і ў многіх іншых, яе шлях да аднаўлення не быў роўным.
У студзені 2019 года яна зноў звярнулася ў рэабілітацыйны цэнтр пасля рэцыдыву, выкліканага стрэсам. Праблемы з псіхічным здароўем працягваліся і пазней.
Байнс шукала сябе ў розных сферах. У 2019 годзе яна завяршыла навучанне ў Fashion Institute of Design & Merchandising (FIDM) у Лос-Анджэлесе і планавала развівацца ў сферы моды.
У 2023 годзе Байнс запусціла падкаст Amanda Bynes & Paul Sieminski, але праект спыніўся пасля першага эпізоду. Пазней яна тлумачыла, што хоча атрымаць ліцэнзію манікюршчыцы і мець больш стабільную працу па-за індустрыяй забаў.
У кастрычніку 2024 года яна разам з дызайнерам Остынам Бэбітам (Asspizza) выпусціла капсульную лінію адзення — футболку і шорты з уласным арт-дызайнам. У снежні таго ж года Байнс з’явілася на часовай выставе-прэзентацыі калекцыі ў Лос-Анджэлесе — гэта быў яе першы публічны выхад за больш чым дзесяць гадоў.
Чым жыве цяпер
За апошнія гады знешнасць актрысы істотна змянілася — новыя прычоскі, татуіроўкі (у тым ліку на твары), эксперыменты са стылем. Для многіх, хто памятае яе па ролях 2000-х, сённяшні вобраз Байнс выглядае зусім інакш.
Байнс вядзе даволі закрыты лад жыцця і рэдка з’яўляецца на публіцы. Час ад часу яна дзеліцца навінамі ў сацыяльных сетках і, паводле ўласных слоў, імкнецца засяродзіцца на здароўі і асабістай стабільнасці.
У 2023 годзе Байнс паведаміла ў сацыяльных сетках, што зрабіла блефарапластыку, бо хацела палепшыць самаацэнку. У 2024 годзе яна падзялілася ў інстаграме, што набрала вагу на фоне праблем з псіхічным здароўем і прыёму лекаў. Паводле яе слоў, гэта паўплывала на самаадчуванне і ўпэўненасць у сабе.
У красавіку 2025 года Аманда стварыла старонку на OnlyFans, падкрэсліваючы, што выкарыстоўвае яе для зносін з прыхільнікамі, а не для правакацыйнага кантэнту.
У чэрвені таго ж года яна ў сторыз свайго інстаграм-акаўнта расказала, што пачала выкарыстоўваць прэпарат Ozempic для зніжэння вагі.
«Я зараз важу 173 фунты (78 кілаграмаў) і спадзяюся скінуць прыкладна да 130 (59 кілаграмаў), што было б цудоўна, каб я лепш выглядала на фотаздымках папарацы», — напісала яна.
У студзені 2026 года Байнс намякнула на магчымы новы кірунак — музычную вытворчасць. У інстаграме актрыса апублікавала фрагмент кампазіцыі ў жанры электроннай танцавальнай музыкі, створанай разам з сябрамі.
Цяпер чытаюць
Што вядома пра былога палітвязня Сакалоўскага, які памёр у Берліне ў 47 гадоў1
Каментары
А так, потухла без надежды воскреснуть.