Праз крызіс, выкліканы паветранымі шарамі з кантрабандай, у Літве абвешчаная надзвычайная сітуацыя
Працяглы крызіс, звязаны з паветранымі балонамі з кантрабандай з Беларусі, прывёў да таго, што ўрад Літвы абвясціў надзвычайную сітуацыю ва ўсёй краіне. Адначасова кіраўніком дзяржаўных аперацый ва ўмовах надзвычайнай сітуацыі прызначаны міністр унутраных спраў Уладзіслаў Кандратовіч, паведамляе LRT.
Як гаворыцца ў праекце пастановы, надзвычайная сітуацыя ўводзіцца на ўсёй тэрыторыі краіны праз запушчаныя з Беларусі паветраныя балоны, якія транспартуюць кантрабанду і нясуць пагрозу нацыянальнай бяспецы Літвы. Міністэрства ўнутраных спраў падкрэслівае, што ўвядзенне надзвычайнай сітуацыі не створыць нязручнасцяў для грамадства, бо меры будуць дакладнымі, прапарцыянальнымі і накіраванымі выключна на арганізатараў і выканаўцаў незаконнай дзейнасці.
У нататцы ўраду МУС тлумачыць, што падчас гібрыдных атак з боку Беларусі балоны ствараюць пагрозу цывільнай авіяцыі Літвы і парушаюць працу Віленскага аэрапорта. Праз гэта, адзначае ведамства, становіцца немагчымай перавозка пасажыраў і грузаў паветраным транспартам, узнікаюць значныя фінансавыя страты і шкода рэпутацыі. Статус надзвычайнай сітуацыі, на думку МУС, дазволіць ведамствам больш шчыльна каардынаваць дзеянні і пры неабходнасці залучаць вайсковыя падраздзяленні.
У панядзелак у эфіры радыё LRT генеральны камісар паліцыі Артурас Паўлаўскас заявіў, што такі крок можа дапамагчы праваахоўнікам больш эфектыўна прадухіляць і расследаваць злачынствы, звязаныя з кантрабандай у паветры.
Цяпер чытаюць
Памятаеце Данііла з Офіса Ціханоўскай, якому за два дні сабралі грошы на анкалагічную аперацыю? Яму напісаў той самы аднакласнік, які яго ўдарыў — з чаго ўсё і пачалося44
Каментары