На мяжы Таджыкістана і Афганістана адбылося ўзброенае сутыкненне, загінулі як мінімум трое
24 снежня на мяжы дзвюх краін загінулі два таджыкскія афіцэры і некалькі ўзброеных асоб з афганскага боку. Інцыдэнт адбыўся ў раёне Бахарак, паведамляе Радыё Свабода Таджыкістан.
Загінулымі з боку Таджыкістана аказаліся 28‑гадовы Ісматула Курбонаў і 33‑гадовы Зірэбон Назрузбекаў.
Крыніца Радыё паведаміла пра некалькіх забітых і аднаго затрыманага з афганскага боку, аднак выданне не змагло праверыць гэтую інфармацыю.
Канфлікт адбыўся ў той самы дзень, калі Таджыкістан увёў у эксплуатацыю чатыры новыя памежныя пасты на мяжы з Афганістанам. Сцвярджаецца, што яны былі пабудаваныя ў высакагорных раёнах і раней не мелі належнай аховы.
Афганскае выданне «Хашці субх» 24 снежня са спасылкай на свае крыніцы піша, што ў агні ў адказ таджыкскіх сіл былі забітыя два ўзброеныя чалавекі з афганскага боку.
Раніцай 25 снежня Дзяржаўны камітэт нацыянальнай бяспекі Таджыкістана пацвердзіў інфармацыю пра ўзброенае сутыкненне.
Каментары