Расійская блогерка Юлія Бурцава, на якую ў Instagram былі падпісаныя больш за 72 тысячы чалавек, памерла пасля аперацыі ў прыватнай касметалагічнай клініцы ў Маскве. Пра гэта паведаміў Следчы камітэт Расіі. Паводле інфармацыі тэлеграм-канала «112», жанчына праходзіла працэдуру па павелічэнні ягадзіц.
Як пішуць СМІ, Бурцава жыла ў Італіі, але спецыяльна для правядзення аперацыі прыляцела ў Расію. Раніцай 4 студзеня яна апублікавала ў сацсетках відэа з цэнтра Масквы, дзе расказвала пра надвор’е і збіралася ў рэстаран.
У той жа дзень блогерка адправілася ў клініку Elmas Clinic. Пасля медыцынскіх і касметалагічных працэдур яе стан рэзка пагоршыўся. Пішуць, што ў дзяўчыны здарыўся анафілактычны шок, пасля чаго наступіла клінічная смерць. Дактары змаглі аднавіць сэрцабіццё і ў крытычным стане даставілі яе ў адну з маскоўскіх бальніц, але выратаваць Юлію Бурцаву не ўдалося. Цяпер па гэтым факце завялі крымінальную справу.
Бурцава раней пераехала з Самары ў Італію, дзе жыла разам з дачкой і мужам-італьянцам. У сваім блогу яна расказвала пра сямейнае жыццё, дзялілася рэцэптамі і здымала гумарыстычныя відэа з мужам.
Гэта не першы падобны выпадак: у снежні 2025 года ў Маскве памерла жанчына пасля дзвюх пластычных аперацый у прыватнай клініцы. Паводле інфармацыі розных крыніц, прычынай смерці маглі стаць цяжкія ўскладненні, у тым ліку тромбаэмбалія або наступствы аспірацыі. Па тым факце таксама было распачата крымінальнае расследаванне.
Цяпер чытаюць
Памерла палітзняволеная Алена Панкова. Паўгода назад яе асудзілі за ўдзел у пратэстах5
Каментары