Вечны прэзідэнт Уганды перамагае на выбарах сёмы раз. Ён кіруе краінай з 1986 года
Мяркуючы з заявы выбарчай камісіі Уганды аб папярэдніх выніках прэзідэнцкіх выбараў, якія адбыліся ў чацвер, вечны Яверы Мусявені лідзіруе з вялікім адрывам ад галоўнага апанента Бобі Вайна. Апазіцыя сцвярджае, што былі ўкіды бюлетэняў, а напярэдадні выбараў у краіне адключылі інтэрнэт, піша Бі-бі-сі.
Угандыйскі выбаркам паведаміў на брыфінгу, што па выніках падліку галасоў на палове выбарчых участкаў Мусявені набраў 76,25%, Вайн — 19,85%, а астатнія галасы размеркаваліся паміж шасцю іншымі кандыдатамі.
Мусявені заявіў журналістам пасля галасавання, што чакае перамогі з 80% галасоў, «калі не будзе махлярства».
Вайн у чацвер заклікаў сваіх прыхільнікаў да пратэстаў, аднак, як адзначае Reuters, прыкмет дэманстрацый пакуль не назіраецца.
Партыя Вайна «Платформа нацыянальнага адзінства» напісала позна ўвечары ў чацвер у X, што вайскоўцы і паліцыя атачылі дом іх лідара ў сталіцы Кампале, фактычна ўзяўшы яго і яго жонку пад хатні арышт.
Як сцвярджаецца, супрацоўнікі сіл бяспекі пераскочылі праз агароджу і разбілі палаткі на тэрыторыі яго дома.
Прадстаўнік паліцыі Кітуума Русоке заявіў агенцтву Reuters, што яму нічога не вядома аб змяшчэнні Вайна пад хатні арышт.
Мусявені, якому зараз 81 год, прыйшоў да ўлады ў выніку вайсковага перавароту ў 1986 годзе.
Афіцыйныя СМІ краіны малююць яго вызваліцелем народа Уганды і міратворцам, а сам ён называе сябе гарантам стабільнасці. Крытыкі кажуць, што ён пабудаваў культ асобы, акружае сябе лаяльнымі людзьмі і запалохвае палітычных праціўнікаў.
З-за яго пажылога ўзросту ідуць размовы пра тое, хто можа стаць яго пераемнікам.
Лічыцца, што ён хацеў бы бачыць пераемнікам сына, кіраўніка ўзброеных сіл Мухузі Кайнеругабе, хоць сам Мусявені адмаўляе, што рыхтуе яго да гэтай ролі. Бобі Вайн (сапраўднае імя Роберт Кіагуланьі Ссентаму) — вядомы ў краіне музыка, выканаўца музыкі ў стылі рэгі.
Прыхільнікі называюць яго «прэзідэнтам трушчоб»: ён вырас у сумна знакамітых трушчобах Кампалы, дзе стварыў сваю музычную студыю, якая стала вядомай ва ўсім свеце. Яго партыя, Платформа нацыянальнага адзінства, змагаецца за пашырэнне доступу насельніцтва да сістэмы аховы здароўя, адукацыі, чыстай вады і за справядлівыя суды.
Вайн заяўляе, што карыстаецца падтрымкай моладзі ў краіне з самым маладым насельніцтвам у свеце: сярэдні ўзрост жыхароў Уганды складае 16 гадоў.
Сітуацыя моцна нагадвае тую, што была пяць гадоў таму, калі праходзілі мінулыя выбары. Галоўным апанентам прэзідэнта таксама быў Бобі Вайн, які набраў, паводле афіцыйных звестак, каля 35% галасоў, а Мусявені набраў 59%.
Цяпер чытаюць
Памілаваныя 15 чалавек, сярод якіх 13 палітвязняў16
Каментары