У ГЦ Palazzo ў найбліжэйшыя месяцы звыклы фудкорт пераабсталююць у фудхол з жывымі раслінамі. Стравы плануюць падаваць у рэстаранным керамічным, а не пластыкавым посудзе, піша Realt.by.
Новы фудхол адкрыецца на трэцім паверсе ГРЦ Palazzo — на месцы звыклага фудкорта. Абяцаюць, што гэта будзе новы для Беларусі фармат. Інтэр’ер абновяць, мэблю заменяць, а саму залу пашыраць. Плошча фудхола складзе 1700 квадратных метраў, піша Realt.by.
Большую частку прасторы зоймуць рэстаранныя столікі, глыбокія канапы і крэслы з чырвонага дрэва. Са столі будуць звісаць 286 унікальных свяцільняў сферычнай формы з атмасферным святлом. Сярод незвычайнага — цягам усяго года паміж сталамі будуць расці больш за 280 жывых раслін: ад шматгадовых кветак да карлікавых дрэў і жывых фітасцен. Сярод іх будуць і рэдкія віды, якія цяжка знайсці ў Беларусі.
У фудхоле будзе працаваць больш за дзесяць аператараў з акцэнтам на аўтарскія стравы. Будуць прэзентаваныя розныя кухні свету, у тым ліку беларуская, узбекская, грузінская, тайская, в’етнамская, кітайская ды італьянская.
Плануецца выкарыстоўваць керамічны посуд замест пластыкавага. Усіх аператараў папрасілі карыстацца рэстаранным посудам і прыборамі. У цэнтры фудхола размесціцца адкрыты бар.
Новы фудхол Foresto пачне працаваць найбліжэйшыя месяцы.
Каментары