Літаратуразнаўца і паліттэхнолаг Аляксандр Фядута ў вялікім інтэрв'ю «ТОКу» распавёў, чаму сям'ю Лукашэнку пасля яго сыходу будзе рваць яго атачэнне і ў чым злачынства Лукашэнкі перад Колем.
Аляксандр Фядута згадвае: у канцы 1994-га, калі ён звальняўся з Адміністрацыі прэзідэнта, дзе фактычна выконваў ролю прэс-сакратара, ён меркаваў, што Лукашэнка пратрымаецца ва ўладзе роўна два тэрміны, якія дапускала тагачасная Канстытуцыя.
«Я разумеў, што ніякага імпічменту не будзе, што ён уладу ўтрымае, але я не думаў, што ён будзе спрабаваць утрымліваць яе пажыццёва», — заўважае паліттэхнолаг.
У 2008 годзе Аляксандр Фядута сцвярджаў, што з’яўленне малодшага сына Колі павінна прымусіць Лукашэнку задумацца аб сыходзе:
«Абараніць хлопчыка ён будзе здольны толькі тады, калі захавае павагу да сябе і калі ён будзе моцны і папулярны. Тое, што зрабіў Лукашэнка, — гэта злачынства не столькі перад беларускім народам (ён лічыць, што беларускі народ абавязаны яму, як зямля калгасу), а вось перад гэтым хлопчыкам, перад сваім малодшым сынам».
Як тлумачыць паліттэхнолаг, цяпер часы змяніліся. У існуючых умовах, «як бы ні сыходзіў Лукашэнка, яго ўласнае атачэнне будзе рваць гэтую сям'ю. (…) Бо ім трэба будзе даказваць народу, што яны былі ўсяго толькі інструментамі ў ягоных руках, што ён іх прымушаў».
Фядута падкрэслівае: Лукашэнка нікога са сваіх чыноўнікаў не прымушаў.
«Ён задавальняў усе просьбы аб сыходзе. І калі ты знаходзішся там, значыцца, цябе гэта задавальняе. І ты знаходзішся там да таго моманту, пакуль цябе гэта задавальняе».
Паліттэхнолаг папярэджвае:
«Тое, што будзе адбывацца з сям’ёй Лукашэнкі пасля — гэта будзе несправядліва, таму што тыя, хто будуць яго рваць, будуць яшчэ горшыя за яго. Бо ён сапраўды верыць у тое, што ён робіць, ён верыць, што інакш нельга. А яны добра разумеюць, што яны робяць. Тут не вера, тут карысць».
Фядута лічыць, што ў свой час Лукашэнка разглядаў магчымасць адыходу ад улады «па мадэлі Назарбаева», аднак, улічваючы далейшае развіццё падзей, а таксама беручы пад увагу лёс сям'і Карымава ва Узбекістане, цяпер ён разумее, што гэта немагчыма.
«Зараз толькі два варыянты ў яго: альбо пажыццёвае прэзідэнцтва, альбо эміграцыя», — даводзіць паліттэхнолаг.
Фядута пагаджаецца, што раней ён лічыў, нібыта нараджэнне малодшага сына зрабіла Лукашэнку больш добрым, аднак цяпер яго паводзінамі кіруе іншае пачуццё:
«Цяпер ім кіруе не любоў да Колі, цяпер ім кіруе страх за сябе».
Фядута не верыць у тое, што Коля разглядаецца як рэальны пераемнік: «Ён жа не панізіў планкі ўзросту [кандыдата ў прэзідэнты] хаця б да трыццаці гадоў. Ён падняў [з 35 да 40 гадоў]. Гэта робяць, калі разумеюць, што сын не будзе пераемнікам».
Чаму Лукашэнка хавае жонку
Па словах Фядуты, пытанні аб тым, чаму Лукашэнка ніколі не з’яўляецца разам са сваёй жонкай, яму задавалі журналісты яшчэ падчас працы ў Адміністрацыі прэзідэнта.
«Журналісты дасталі мяне гэтым пытаннем. Урэшце я падышоў да Аляксандра Рыгоравіча і сказаў: «Аляксандр Рыгоравіч, прабачце, прэзідэнты бываюць жанатыя, нежанатыя і ўдовыя. Калі мы будзем забіваць Галіну Радзівонаўну?» — згадвае Фядута.
Па яго словах, Лукашэнка зразумеў жарт і ў сваю чаргу спытаў: «Ты хочаш, каб я хлусіў народу?» — «Не» — «Тады будзе так, як ёсць».
Цяпер чытаюць
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2222
Каментары