Літоўскія памежнікі днямі затрымалі грамадзяніна Беларусі, які знаходзіўся ў міжнародным вышуку па ініцыятыве Даніі. Пра гэта 17 лютага паведаміла Служба аховы дзяржаўнай мяжы Літвы.
Інцыдэнт адбыўся ў пункце пропуску «Меднікі» (з беларускага боку — «Каменны Лог»). Раніцай 15 лютага 31‑гадовага беларуса знялі з аўтобуса, які ехаў з Мінска ў Коўна. Падчас праверкі высветлілася, што прыкладна месяц таму дацкая паліцыя абвясціла яго ў міжнародны вышук праз Інтэрпал.
Менш чым праз гадзіну пасля затрымання мужчыну перадалі супрацоўнікам паліцыі, якія прыбылі з Вільні. Яго даставілі ў сталічны ізалятар.
Паводле звестак літоўскай службы, за першыя сем тыдняў 2026 года памежнікі затрымалі 73 чалавекі, якіх шукалі праваахоўныя органы Літвы і іншых краін за розныя злачынствы або правапарушэнні. Сярод іх большасць — грамадзяне Літвы (58 чалавек). Таксама былі затрыманыя грамадзяне Расіі (6), Латвіі (3), Беларусі (2), а таксама Ірландыі, Вялікабрытаніі, Малдовы і Украіны — па адным чалавеку.
У 2025 годзе літоўскія памежнікі затрымалі 11 беларусаў, што знаходзіліся ў вышуку, а ў 2024 годзе — 6.
Каментары