Аўстралійскія даследчыкі паспрабавалі адказаць на пытанне, ці здольны чалавек размнажацца па-за межамі Зямлі. Для гэтага яны правялі незвычайны эксперымент — прапусцілі сперму праз мініяцюрную «паласу перашкод», якая імітуе ўмовы мікрагравітацыі.
Пытанне аб тым, ці здольнае чалавецтва стаць міжпланетным відам, напрамую залежыць ад магчымасці паспяховага зачацця і нараджэння дзяцей у космасе. Нядаўняе даследаванне аўстралійскіх навукоўцаў з Універсітэта Адэлаіды пралівае святло на тое, як умовы мікрагравітацыі ўплываюць на рэпрадуктыўныя працэсы.
Як піша The Telegraph, для праверкі здольнасці сперматазоідаў да выжывання ў экстрэмальных умовах даследчыкі стварылі спецыяльную мініяцюрную «паласу перашкод» з пластыка, якая імітуе жаночыя рэпрадуктыўныя шляхі. Унутры яе сперматазоіды павінны былі «праплысці» ад аднаго канца да другога. Каб узнавіць умовы космасу, прыладу пастаянна круцілі, ствараючы эфект амаль поўнай адсутнасці гравітацыі. У такіх умовах праверылі сперму як чалавека, так і мышэй.
Вынікі паказалі, што ў мікрагравітацыі сперматазоіды значна горш арыентуюцца: іх здольнасць прайсці «трасу» знізілася прыкладна на 50%. У выніку агульная верагоднасць паспяховага апладнення ўпала прыкладна на траціну ў параўнанні з звычайнымі зямнымі ўмовамі. Такія даныя пацвярджаюць, што працэс зачацця ў космасе будзе патрабаваць ад арганізма значна большых рэсурсаў.
Аднак вынікі даследавання, апублікаваныя ў часопісе Communications Biology, утрымліваюць і нечаканыя высновы. Навукоўцы заўважылі, што мікрагравітацыя выступае ў ролі жорсткага прыроднага фільтра. Стрэсавыя ўмовы адсейваюць слабыя клеткі, дазваляючы дасягнуць мэты толькі самым жыццёва здольным сперматазоідам, што можа стаць пэўнай перавагай для касмічнай рэпрадукцыі.
Тым не менш асноўная пагроза для будучых каланістаў тоіцца не ў самім зачацці, а ў першых сутках пасля яго. Даследчыкі выявілі, што праз 24 гадзіны пасля апладнення сітуацыя рэзка пагаршаецца: колькасць сфармаваных эмбрыёнаў істотна змяншаецца, а тыя, што выжываюць, маюць прыкметы нізкай якасці.
Даследчыкі мяркуюць, што для паспяховага размнажэння па-за Зямлёй неабходна будзе знайсці спосабы абараніць эмбрыён у гэтыя крытычныя першыя гадзіны.
Сёння некаторыя футурысты, у тым ліку заснавальнік SpaceX Ілан Маск, будуюць амбітныя планы па ператварэнні чалавецтва ў міжпланетны від шляхам стварэння паселішчаў на Месяцы, а затым і на Марсе. Існуюць прагнозы, што першае дзіця, зачатае па-за межамі Зямлі, можа з’явіцца ў выніку палавога акту пары падчас турыстычнага касмічнага палёту.
Аднак навуковая супольнасць заклікае да стрыманасці, падкрэсліваючы, што апладненне — гэта толькі пачатковы этап надзвычай складанага працэсу. Наперадзе яшчэ шмат гадоў даследаванняў, перш чым чалавецтва ўбачыць першае дзіця, зачатае і народжанае ў космасе.
Цяпер чытаюць
Арыштаваны міністр прыродных рэсурсаў выбраў «стратэгію Брыло»1
Арыштаваны міністр прыродных рэсурсаў выбраў «стратэгію Брыло»
Беларус-вахтавік на Ямале стварае песні на беларускай мове з дапамогай ШІ. «Раней музыка была закрытым клубам. Нейрасеткі адчынілі гэтыя дзверы з нагі»2020
Каментары