Столінскі райвыканкам закупіў бронекамізэлькі — больш за 400 штук. Падобныя тэндары аб’яўляюць і іншыя мясцовыя органы ўлады. Напрыклад, 485 аналагічных сродкаў абароны мае намер набыць Глыбоцкі райвыканкам, заўважыла выданне «Люстэрка».
Столінскі райвыканкам у сакавіку заключыў здзелку на набыццё 408 бронекамізэлек, вынікае з даных дзяржзакупкі. Паставіць іх мясцовым уладам павінны з красавіка да канца кастрычніка гэтага года.
Першапачаткова на закупку гатовыя былі выдзеліць больш за 1 млн рублёў, але, вывучыўшы цэны ад розных патэнцыйных пастаўшчыкоў, спыніліся на маладой мінскай кампаніі «НПК Браня», якая прапанавала самы бюджэтны варыянт. У выніку больш за 400 бронекамізэлек каштавалі 639 336 рублёў. Грошы на гэта ўзялі з раённага бюджэту. Гэта значыць, кожная ў сярэднім каштавала крыху больш за 1,5 тысячы рублёў.
Усяго выканкаму спатрэбілася па 204 бронекамізэлькі другога і трэцяга ўмоўнага памеру. Першы з іх на рост 176—182 см, а другі — 183—188 см.
«Колер бронекамізэлек — лічбавы камуфляж (які выкарыстоўваецца ва Узброеных сілах Рэспублікі Беларусь)», — пазначана ў заяве на дзяржзакупку. Яны павінны мець абарону ад стрэлаў пісталета, удараў нажа і асколкаў, плюс мець узмоцненыя ўстаўкі спераду і ззаду ад больш сур’ёзнай зброі (напрыклад, стрэлу аўтамата).
Глыбоцкі райвыканкам размясціў падобную заяўку ў красавіку. Яму спатрэбілася ў агульнай колькасці 485 бронекамізэлек. Структура гатовая заплаціць за іх да 1,2 мільёна рублёў — таксама з раённага бюджэту.
Аналагічны запыт на закупку размясціў выканкам Бярозаўскага раёна. Яму патрабуецца 800 бронекамізэлек. Столь па выдатках пазначаная ў 1,35 мільёна рублёў. Ёсць такія запыты і ад іншых органаў улады — сумы і колькасць адрозніваюцца.
Такія закупкі здараліся і раней, але, мяркуючы па даных сайта дзяржзакупак, не такія масавыя, а колькасць сродкаў абароны і сумы былі заўважна ніжэйшыя. Напрыклад, у 2024 годзе Пінскі гарвыканкам на куплю 240 штук патраціў 321 тысяч рублёў. Івацэвіцкі райвыканкам у 2025‑м набыў 36 штук за 73,7 тысячы рублёў.
МАЗ пачаў рабіць для Расіі браняваныя машыны хуткай дапамогі
Эклеры, баявое НЛП і дух «Вагнера». Што хаваецца за плотам спецназаўскай часці 3214
На мяжы з Украінай пачынаецца новы этап будаўніцтва вайсковага палігона
Следчы камітэт Беларусі набыў сувенірныя гадзіннікі па 800 даляраў
Лукашэнка зноў апалчыўся на пасярэднікаў. Гэтаму змаганню ўжо хутка 20 гадоў
Каментары