Лукашэнку перадалі ліст, напісаны ім яшчэ ў маладосці. Што там?
Аляксандру Лукашэнку ў Шклоўскім раёне перадалі ліст, напісаны ім у гады, калі ён балатаваўся ў дэпутаты. Выглядае, гэта абяцанні Лукашэнкі выбаршчыкам. Як ён выканаў іх?
Ліст Лукашэнку перадаў старшыня Шклоўскага райвыканкама Сяргей Барташ. Ліст быў напісаны ў тыя гады, калі Аляксандр Лукашэнка ўзначальваў саўгас «Гарадзец».
«Вы пісалі пра тое, што ўвасобілі ў жыццё: захаваць вёскі і населеныя пункты, даць роўныя ўмовы гарадскім і сельскім жыхарам… Мы не ведаем, быў ён надрукаваны ў раённай газеце ці не. Але мы знайшлі яго ў архіве», — сказаў Сяргей Барташ.
«Я прачытаю. Наўрад ці ён быў апублікаваны. У нас былі складаныя адносіны з партыйнымі органамі», — адказаў Лукашэнка і падзякаваў старшыні Шклоўскага райвыканкама.
Ці выканаў ён абяцанні?
Як падлічыла «Люстэрка», за апошнія 30 гадоў з карты Беларусі знікла амаль 1700 населеных пунктаў, а многія пакуль яшчэ нібыта існуюць — але ўжо зусім без жыхароў. У сярэднім кожны са 118 раёнаў нашай краіны канчаткова страціў ужо 14 вёсак.
У перыяд кіравання Аляксандра Лукашэнкі знікаюць нават тыя населеныя пункты, якія змаглі аднавіцца пасля знішчэння нацыстамі ў гады Другой сусветнай вайны.
Па падліках журналістаў, у сярэднім кожны тыдзень знаходжання Лукашэнкі ва ўладзе ў Беларусі знікае адна вёска.
Яшчэ лічбы пра захаванасць вёскі і роўнасць з горадам (даныя на 2024 год)
За 30 гадоў сельскае насельніцтва скарацілася на 1,3 млн чалавек (з 3,2 млн да 1,9 млн). Усе вёскі краіны разам узятыя налічваюць менш людзей, чым адзін Мінск.
Смяротнасць на вёсцы ў тры разы перавышае нараджальнасць.
Доля людзей за мяжой беднасці ў вёсцы ў два разы вышэйшая, чым у горадзе (6% супраць 2,9%).
Сярэдняя сельская сям'я мае на 20% менш рэсурсаў, чым гарадская.
Гарачую ваду маюць менш за палову сельскіх дамоў (47%), а ў Віцебскай вобласці — толькі 24%.
Сярэдні вясковец жыве на 4 гады менш, чым гараджанін (71,7 года супраць 75,7 года).
Толькі за 5 гадоў — з 2019 па 2024 год — на вёсцы закрыта 178 дзіцячых садоў і 161 школа.
Садкі наведваюць толькі 58% вясковых дзяцей (у горадзе — 96%).
Колькасць крам на вёсцы скарачаецца на 100—250 аб’ектаў штогод. Доля сельскай мясцовасці ў тавараабароце ўпала да мінімальных 13,4%.
-
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча
-
Допыты ў клетцы і пагрозы смерцю. Што адбываецца са студэнтамі ЕГУ пасля прызнання ўніверсітэта «экстрэмісцкім»
-
Расійская спявачка Вікторыя Дайнека мала таго што пракацілася з канцэртамі па акупаваных тэрыторыях, дык яшчэ і пастраляла
Цяпер чытаюць
«Калі вы пазакрываеце я**льнікі»: злоўлены на допінгу амапавец з Гродна паказаў сваё высокакультурнае аблічча10
Каментары