Еўрапейскі саюз канчаткова ўхваліў выдзяленне Украіне крэдыту ў памеры 90 мільярдаў еўра, а таксама прыняў новы пакет санкцый супраць Расіі. Пра гэта паведамілі прадстаўнікі Кіпра, які цяпер старшынствуе ў ЕС.
Паведамляецца таксама, што на Кіпр прыбыў прэзідэнт Украіны Уладзімір Зяленскі, які ўдзельнічае ў саміце Еўрасаюза.
Кіраўніцтва ЕС адзначыла, што стратэгія гэтага аб'яднання па дасягненні трывалага і справядлівага міру ва Украіне грунтуецца на двух асноўных кірунках: падтрымка самой Украіны і ўзмацненне ціску на Расію. Паводле слоў кіраўніка Еўрарады Антоніу Кошты, рашэнні, прынятыя цяпер, адпавядаюць абодвум гэтым мэтам.
Новы пакет санкцый прадугледжвае шэраг дадатковых абмежаванняў супраць Расіі і Беларусі.
У прыватнасці, уводзіцца забарона на аказанне марскіх паслуг, звязаных з расійскімі нафтапрадуктамі. Гэта азначае, што кампаніі з ЕС не змогуць абслугоўваць судны, якія перавозяць такую прадукцыю з расійскіх партоў.
Таксама плануецца ўзмацніць меры супраць так званага «ценявога флоту», які выкарыстоўваецца Расіяй для абыходу санкцый, а таксама супраць іншых краін, што дапамагаюць ёй у гэтым.
Што да Беларусі, то прапануецца распаўсюдзіць на яе шэраг абмежаванняў, якія ўжо дзейнічаюць супраць Расіі. У тым ліку — забарону на пастаўкі тавараў з высокімі тэхналогіямі, прамысловых трактароў вялікай магутнасці, станкоў для апрацоўкі металу, лабараторнага шкла, спецыяльных гумовых і змазачных матэрыялаў і іншых падобных вырабаў.
Акрамя таго, ЕС хоча забараніць аказанне Беларусі паслуг у сферы кібербяспекі, перш за ўсё для дзяржаўных структур і арганізацый, звязаных з імі.
Упершыню санкцыі закранаюць і турыстычную сферу: плануецца абмежаваць дзейнасць турыстычных кампаній, гідаў і рэкламу паездак у Беларусь. Для ўжо заключаных дамоваў прадугледжваецца кароткі пераходны перыяд.
Каб ускладніць абыход санкцый, ЕС таксама збіраецца пашырыць спіс тавараў і тэхналогій, забароненых для транзіту праз тэрыторыю Беларусі.
Дадаткова прапануецца ўвесці новыя абмежаванні на імпарт беларускай прадукцыі — у тым ліку сыравіны, металаў, хімічных рэчываў, гумовых вырабаў і апрацаваных шкур.
Разам з гэтым узмацняецца прававая абарона кампаній з ЕС: іх хочуць лепш абараніць ад магчымых судовых пазоваў не толькі з боку Беларусі, але і ад арганізацый з іншых краін, якія могуць пацярпець з-за санкцый.
Папярэдне паслы краін ЕС узгаднілі крэдыт і санкцыі яшчэ ў сераду. Гэта стала магчымым пасля таго, як Венгрыя адмовілася ад свайго вета, што дазволіла канчаткова зацвердзіць гэтыя меры.
Цяпер чытаюць
Дзяцей-футбалістаў з Рэчыцы павезлі ў Геленджык па прыфрантавой вобласці Расіі. У аўтобус трапіў беспілотнік50
Каментары
[Зрэдагавана]