U ES kančatkova ŭchvalili kredyt dla Ukrainy i sankcyi suprać Rasii
Jeŭrapiejski sajuz kančatkova ŭchvaliŭ vydzialeńnie Ukrainie kredytu ŭ pamiery 90 miljardaŭ jeŭra, a taksama pryniaŭ novy pakiet sankcyj suprać Rasii. Pra heta paviedamili pradstaŭniki Kipra, jaki ciapier staršynstvuje ŭ ES.
Paviedamlajecca taksama, što na Kipr prybyŭ prezident Ukrainy Uładzimir Zialenski, jaki ŭdzielničaje ŭ samicie Jeŭrasajuza.
Kiraŭnictva ES adznačyła, što stratehija hetaha abjadnańnia pa dasiahnieńni tryvałaha i spraviadlivaha miru va Ukrainie hruntujecca na dvuch asnoŭnych kirunkach: padtrymka samoj Ukrainy i ŭzmacnieńnie cisku na Rasiju. Pavodle słoŭ kiraŭnika Jeŭrarady Antoniu Košty, rašeńni, pryniatyja ciapier, adpaviadajuć abodvum hetym metam.
Novy pakiet sankcyj praduhledžvaje šerah dadatkovych abmiežavańniaŭ suprać Rasii i Biełarusi.
U pryvatnaści, uvodzicca zabarona na akazańnie marskich pasłuh, źviazanych z rasijskimi naftapraduktami. Heta aznačaje, što kampanii ź ES nie zmohuć absłuhoŭvać sudny, jakija pieravoziać takuju pradukcyju z rasijskich partoŭ.
Taksama płanujecca ŭzmacnić miery suprać tak zvanaha «cieniavoha fłotu», jaki vykarystoŭvajecca Rasijaj dla abychodu sankcyj, a taksama suprać inšych krain, što dapamahajuć joj u hetym.
Što da Biełarusi, to prapanujecca raspaŭsiudzić na jaje šerah abmiežavańniaŭ, jakija ŭžo dziejničajuć suprać Rasii. U tym liku — zabaronu na pastaŭki tavaraŭ z vysokimi technałohijami, pramysłovych traktaroŭ vialikaj mahutnaści, stankoŭ dla apracoŭki mietału, łabaratornaha škła, śpiecyjalnych humovych i zmazačnych materyjałaŭ i inšych padobnych vyrabaŭ.
Akramia taho, ES choča zabaranić akazańnie Biełarusi pasłuh u śfiery kibierbiaśpieki, pierš za ŭsio dla dziaržaŭnych struktur i arhanizacyj, źviazanych ź imi.
Upieršyniu sankcyi zakranajuć i turystyčnuju śfieru: płanujecca abmiežavać dziejnaść turystyčnych kampanij, hidaŭ i rekłamu pajezdak u Biełaruś. Dla ŭžo zaklučanych damovaŭ praduhledžvajecca karotki pierachodny pieryjad.
Kab uskładnić abychod sankcyj, ES taksama źbirajecca pašyryć śpis tavaraŭ i technałohij, zabaronienych dla tranzitu praz terytoryju Biełarusi.
Dadatkova prapanujecca ŭvieści novyja abmiežavańni na impart biełaruskaj pradukcyi — u tym liku syraviny, mietałaŭ, chimičnych rečyvaŭ, humovych vyrabaŭ i apracavanych škur.
Razam z hetym uzmacniajecca pravavaja abarona kampanij ź ES: ich chočuć lepš abaranić ad mahčymych sudovych pazovaŭ nie tolki z boku Biełarusi, ale i ad arhanizacyj ź inšych krain, jakija mohuć paciarpieć z-za sankcyj.
Papiarednie pasły krain ES uzhadnili kredyt i sankcyi jašče ŭ sieradu. Heta stała mahčymym paśla taho, jak Vienhryja admoviłasia ad svajho vieta, što dazvoliła kančatkova zaćvierdzić hetyja miery.
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary
[Zredahavana]