На пратэстанцкі фестываль у «Чыжоўку-Арэну» едзе амерыканскі прапаведнік Франклін Грэм. Разам з ім чакаюць Коўла з жонкай
Беларускім пратэстантам дазволілі правесці беспрэцэдэнтны евангелізацыйны фестываль у «Чыжоўка-Арэне». Па інфармацыі «Нашай Нівы», на яго могуць прыехаць Джон Коўл і ягоная жонка Грэта ван Састэрэн. Ці з гэтай нагоды на свабоду выйдзе яшчэ група вязняў сумлення?
16‑17 мая беларускія пратэстанты збяруцца ў Мінску на «Фестываль надзеі». Для правядзення гэтага форуму ўпершыню згуртаваліся дзве пратэстанцкія дэнамінацыі: хрысціяне веры евангельскай і баптысты. Улады дазволілі ім арандаваць «Чыжоўка-Арэну». А галоўным госцем будзе Франклін Грэм — вядомы баптысцкі прапаведнік з ЗША і сын культавага казанніка Білі Грэма.
Франклін Грэм узначальвае дабрачынны фонд Samaritan's Purse. Ён уплывовы ў ЗША прапаведнік: ён не раз сустракаўся і з прэзідэнтам Дональдам Трампам.
Падзея будзе настолькі вялікая, што адзін толькі хор, які спявацьме на сходзе, будзе налічваць 1300 чалавек.
Рэпетыцыі выступу ўжо ідуць, у хоры будуць спяваць беларусы з 42 гарадоў і вёсак.
Акрамя хору, абяцаюць розных музыкаў, у тым ліку з ЗША.
28 красавіка быў вызвалены знакавы палітзняволены Андрэй Пачобут. Спецпасланнік прэзідэнта ЗША па Беларусі Джон Коўл у гэты дзень знаходзіўся ў сталіцы Польшчы Варшаве. На прэс-канферэнцыі з міністрам замежных спраў Польшчы Радаславам Сікорскім ён расказаў, што «праз два-тры тыдні» зноў паедзе ў Беларусь.
Хутчэй за ўсё, новы прыезд Джона Коўла ў Мінск будзе прымеркаваны менавіта да вялікага пратэстанцкага форуму.
Але пры чым тут Коўл? Рэч у тым, што яго жонка Грэта ван Састэрэн даўно супрацоўнічае з фондам Samaritan's Purse і асвятляе яго працу як журналістка. Франклін Грэм не толькі з ёй знаёмы, ён яшчэ і ведае пра працу Джона Коўла па вызваленні беларускіх палітвязняў: Грэм рэпосціў відэа, дзе Грэта абвяшчае пра адно з чарговых масавых вызваленняў палітвязняў.
Грэм называе Коўла сваім сябрам. Ёсць фота Коўла разам з жонкай і Грэмам у Алясцы.
У снежні Франклін Грэм, рэпосцячы артыкул пра перамовы Коўла з Лукашэнкам, пісаў: «Я спадзяюся, што аднойчы змагу прапаведаваць Евангелле ў Беларусі».
Па даных «Нашай Нівы», Грэта ван Састэрэн прыедзе ў Беларусь і на цяперашні сход. Выглядае, што разам з ёй прыедзе і Джон Коўл. Магчыма, разам з гэтым адбудуцца і новыя вызваленні палітвязняў.
«Я чакаю, што мы зможам дабіцца вызвалення некаторых зняволеных найбліжэйшым месяцам, — сказаў Джон Коўл агенцтву Reuters 28 красавіка. — І я вярнуся, каб садзейнічаць гэтаму на працягу наступнага месяца. Нічога пэўнага, але, мабыць, у наступным месяцы».
«Наша Нiва» — бастыён беларушчыны
ПАДТРЫМАЦЬ
Каментары
бо амерыканския фонды адлічваюць рэжыму грошыкb...