Беларусы дапамаглі маладой маці з інваліднасцю зрабіць рамонт у інтэрнаце. Інакш дзіця забралі б у дзіцячы дом
Дзякуючы неабыякавым людзям маленькі хлопчык, які нарадзіўся раней тэрміну, застанецца з мамай.
Амаль тыдзень таму беларуска Алёна Мартыненка распавяла ў сацсетках пра складаную сітуацыю, у якую трапіла маладая маці Настасся.
Настассі 22 гады, сама яна вырасла ў дзіцячым доме (і не вельмі прыстасаваная да жыцця ў звычайным свеце), мае інваліднасць па зроку.
Дзяўчына зацяжарыла — а тата дзіцяці знік за гарызонтам, калі пра гэта даведаўся. Нарадзіла яна раней за належны тэрмін. Хлопчык з’явіўся на свет вагой 2,6 кілаграма і ростам 49 сантыметраў.
Адбылося ўсё так нечакана, што Настасся апынулася ў 5 радзільні Мінска без рэчаў, якія былі неабходны для яе і немаўля. Алёна праз сацсеткі знайшла шмат людзей, якія захацелі дапамагчы і прывезці ўсё ў бальніцу.
Праўда высветлілася, што месяц таму група жанчын ужо збірала для Настассі неабходнае — але ж жанчына разгубілася і не ўзяла нічога з сабой у радзільню. Алёна адзначае, што маладой маці неабходна падтрымка і настаўніцтва.
Але ж сітуацыя ўскладнялася тым, што маладая маці жыла ў інтэрнаце — у адным пакоі з суседкай. А ўмовы там былі не самыя лепшыя — асабліва для дзіцяці. Існавала рызыка, што маленькага хлопчыка не дазволяць забраць туды, а адправяць у дзіцячы дом.
Да вырашэння гэтага пытання таксама падключыліся неабыякавыя беларусы. За два дні яны зрабілі амаль немагчымае: дамагліся, каб суседка атрымала новае месца і арганізавалі яе пераезд, выклікалі клінінг, выкінулі старую канапу і набылі новую, паставілі ложачак і камод з спавівальным столікам, павесілі новыя шторы, пасцялілі дыван, прывезлі новыя коўдры і падушкі. А яшчэ ўсталявалі мікрахвалёўку, перагладзілі гару дзіцячага адзення і памылі дзіцячы вазочак.
Алёна называе гэта сапраўдным цудам. Чакаецца, што ў хуткім часе органы апекі прымуць пакой і тады дактары змогуць выпісаць маці з сынам дамоў.
Цяпер валанцёры думаюць пра тое, як дапамагчы Настассі адаптавацца да ролі маці — бо вельмі важна, каб жанчына, якая сама вырасла ў дзіцячым доме, навучылася браць адказнасць за сваё жыццё.
У беларускіх радзільнях няма прэпарату, які неабходны нованароджаным
У беларускіх радзільнях бяруць у закладнікі немаўлят, якіх нарадзілі мігранткі, каб спагнаць з бацькоў грошы? Разбіраемся
Беларуска пры родах атрымала рэдкае ўскладненне: «Выпісалі са стомай у боку»
26‑гадовая цяжарная ў Дзяржынску памерла праз беларускі антыбіётык, які раней ужо забаранялі — бо ад яго загінула некалькі жанчын
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»12
Каментары
Ганьба усім дзяржаўным органам і асабіста органам апекі якія НІЧОГА не зрабілі для дапамогі маладой маці з інваліднасцю, у якой няма родзічаў, каб навучыць, што рабіць з маленькім дзіцём.
А толькі пагражаюць адабраць дзіця і ствараюць стрэс для чалавека, які трапіў у цяжкую сітуацыю.
А роды раней тэрміна і ўвогуле нараджэнне дзіцяці, - гэта стрэс і цяжкая сітуацыя абсалютна для любой жанчыны, і той, што з мужам, і той, што з уласнай кватэрай з сучасным рамонтам, і з грашыма, і з кар'ерай.
І цэрберы з органаў апекі з іх пагрозамі адабраць дзіця - гэта тая кантора, якая толькі і можа, што ствараць стрэс і пагрозу датэрміновых родаў.
Дапамогі ад органаў апекі - НОЛЬ, ні з жыллём не дапамагаюць, ні з рамонтам, ні з аліментамі, ні з пасобіем, ні з дзіцячым харчаваннем, ні з адзеннем, ні з краваткай, ні з каляскай, ні з лекамі, ні з няней. Ноль дапамогі.