Самая высокая верагоднасць моцных навальніц чакаецца па захадзе Віцебскай вобласці.

У панядзелак па Беларусі могуць прайсці тарнада. Для поўначы краіны ESTOFEX (ініцыятыва еўрапейскіх метэаролагаў па прадказанні штормаў) абвясціла 2‑і ўзровень небяспекі ў сувязі з буйным градам, моцнымі і шквалістымі парывамі ветру, а таксама магчымасцю ўтварэння некалькіх тарнада (смерчаў), паведамляе «Метэавайб».
На большай частцы краіны заўтра прагназуюцца дажджы з навальніцамі. Месцамі пройдуць моцныя ліўні, у асобных раёнах град і шквалы да 15—20 м/с. Па паўночным захадзе можа выпасці больш за 50% месячнай нормы ападкаў.
Паводле даных швейцарскай мадэлі S4x4, зона небяспечных умоў надвор’я зрушылася на поўнач, але іх магчымая інтэнсіўнасць не аслабла.
Самая высокая верагоднасць моцных навальніц чакаецца па захадзе Віцебскай вобласці. Таму могуць узнікнуць магутныя супер’ячэйкі (від навальніцы з пастаянна круцячымся ўзыходзячым патокам паветра) з буйным градам большым за 2 см, шкваламі 20 м/с і верагоднасцю лакальных тарнада.

Каментары