Колькі арэнднага жылля цяпер будуецца ў Мінску? Адзін з дамоў — для сілавікоў
У Мінску будуюць шэсць арэндных жылых дамоў на розных пляцоўках. Пра гэта ў эфіры праграмы «Гаворыць і паказвае Мінск» расказала старшыня камітэта будаўніцтва і інвестыцый Мінгарвыканкама Ірына Гонтарава.
Фінансуецца будаўніцтва такога жылля па некалькіх кірунках.
«Першая крыніца — гэта сродкі, якія паступаюць ад ужо пабудаванага арэнднага жылля, так званае гарадское арэнднае жыллё. Яно размеркоўваецца сярод чаргавікоў, якія стаяць на ўліку тых, хто мае патрэбу ў паляпшэнні жыллёвых умоў, па адміністрацыях раёнаў. Другая крыніца — за кошт рэспубліканскага бюджэту для супрацоўнікаў сілавых структур. Трэцяя — за ўласныя сродкі прадпрыемстваў для іх работнікаў», — патлумачыла Гонтарава.
Адзін з дамоў узводзіцца ў межах вуліц Карвата — Геалагічнай — Сувязістаў. Яго будуюць за кошт сродкаў прадпрыемстваў і прызначаны ён для іх супрацоўнікаў. Чатыры арэндныя дамы будуюцца ў раёне вуліц М. Лынькова, П. Глебкі і праезда Масюкоўшчына. Гэтыя аб’екты таксама ўзводзяцца з удзелам прадпрыемстваў і горада, туды заселяць работнікаў і грамадзян, якія стаяць у чарзе.
Яшчэ адзін арэндны дом будуецца ў Лошыцы за кошт рэспубліканскага бюджэту і прызначаны для супрацоўнікаў сілавых структур.
Асобны дом у гэтым жа жылым раёне ўзводзіцца за кошт гарадскога спецрахунку.
«Аб’ёмы будаўніцтва арэнднага жылля штогод павялічваюцца, гэтая тэндэнцыя з улікам попыту будзе працягвацца», — адзначыла Гонтарава.
Каментары
Фармуліроўкі "аб’екты з удзелам горада" і "работнікаў і грамадзян, якія стаяць у чарзе" значаць, што выканкам таксама раздае жыллё па сваім спісам, у якіх шмат сілавікоў (карнікаў).
А яшчэ пры будаўніцтве забудоўшчыкі аддаюць гораду пэўную долю кватэр. І яны таксама ідуць на работнікаў, чаргу або цалкам пад дзяржаўную арэнду.
Яшчэ канкрэтней, названыя тэрыторыі: Сцяпянка, Масюкоўшчына - гэта былыя вайсковыя гарадкі. Прызначэнне такіх тэрыторый звычайна захоўваецца на стадыях дамоўленасцей з горадам.
Так што рэальна паўстае пытанне, а колькі ўвогуле звычайных людзей, не сілавікоў будзе ў гэтых 6 дамах.