«Накіраваў аўтамабіль у бок паліцыянтаў». У польскай пракуратуры пракаментавалі справу са стральбой па беларусе ў Польшчы

Што кажуць у Беларусі

Паводле даных Следчага камітэта Беларусі, уначы 12 мая 60‑гадовы ўраджэнец Слоніма ехаў у Польшчы па аўтадарозе S8. Паблізу горада Сыцаў (гэта ў Ніжнесілезскім ваяводстве) «на яго быў учынены беспадстаўны напад з боку польскіх сілавікоў, з ужываннем агнястрэльнай зброі».

Кіроўца атрымаў цяжкія агнястрэльныя раненні галавы і канечнасцяў, а ў аўтамабілі налічылі 29 кулявых адтулін.

Канал «Беларусь 1» пазней паведаміў, што мужчыну даставілі ў бальніцу ў Польшчы, але там нібыта аказалі дапамогу з грубымі парушэннямі, а праз некалькі дзён проста выкінулі, і цяпер беларус можа застацца інвалідам.

Тым не менш, як пазначана ў матэрыялах Следчага камітэта, нягледзячы на цялесныя пашкоджанні, мужчыну «ўдалося перасекчы мяжу, адкуль ён быў экстранна дастаўлены ва ўстанову аховы здароўя ў вельмі цяжкім стане».

Што кажуць ва Уроцлаўскай пракуратуры

Most накіраваў запыт у Акруговую пракуратуру ва Уроцлаве. Ёй падпарадкоўваецца раённая пракуратура ў Алясніцы, якая вядзе справу. 22 мая быў атрыманы адказ за подпісам прэс-сакратара Даміяна Поўнука, які апісвае, што здарылася ўночы 12 мая ў раёне Сыцава.

«Як устаноўлена на гэты момант у ходзе праведзеных расследаванняў, умяшанне ажыццяўлялі супрацоўнікі Крымінальнага аддзела Гарадской камендатуры паліцыі ў Валбжыху. Мэтай іх дзеянняў было затрыманне асоб, якія ўчынілі крадзеж аўтамабіляў марак Citroen і Peugeot.

На трасе S8 у кірунку Алясніцы супрацоўнікі заўважылі транспартны сродак, які адпавядаў апісанню. Рухаючыся за ім, супрацоўнікі паліцыі западозрылі, што аўтамабіль маркі Citroen, за якім вялося назіранне, суправаджаецца кіроўцам аўтамабіля BMW. Абодва транспартныя сродкі з’ехалі на прыдарожную зону абслугоўвання (MOP) у раёне населенага пункта Сыцаў, і супрацоўнікі вырашылі правесці там умяшанне.

Пры ўездзе ў MOP супрацоўнікі паліцыі ўключылі гукавыя і светлавыя сігналы і вырашылі праверыць дакументы ва ўсіх кіроўцаў. Кіроўцу аўтамабіля BMW было загадана пакінуць транспартны сродак, а паколькі ён не рэагаваў, яго выцягнулі з аўтамабіля і надзелі на яго кайданкі. У гэты час кіроўца Citroen пакінуў месца здарэння, наехаўшы на ступню супрацоўніка паліцыі. За ім накіраваўся адзін з патрулёў», — апісвае ход падзей пракуратура.

У нейкі момант да месца стаянкі пад’ехаў яшчэ адзін аўтамабіль — таксама BMW. Верагодна, яго кіроўца быў звязаны з двума іншымі. Мяркуючы па ўсім, гэта быў той самы аўтамабіль, у які стралялі паліцыянты.

«Затым паспрабаваў з’ехаць кіроўца другога аўтамабіля BMW, выконваючы небяспечныя манеўры — рэзка здаючы назад і паварочваючы, а таксама накіроўваючы аўтамабіль у бок супрацоўніка паліцыі, у выніку чаго ў дачыненні да яго была ўжытая агнястрэльная зброя», — апісвае пракуратура.

Пракуратура вядзе дзве справы

У сувязі са здарэннем Раённая пракуратура ў Алясніцы вядзе дзве падрыхтоўчыя справы. Адну — у дачыненні да двух кіроўцаў, якія не спыніліся па патрабаванні паліцыянтаў і ўчынілі на іх напад, накіроўваючы на іх аўтамабілі. Адзін да таго ж наехаў супрацоўніку правапарадку на нагу. Адным з гэтых двух мужчын з’яўляецца паранены беларус. Трэці кіроўца, якога вывалаклі з машыны, фігурантам справы не стаў.

Падрыхтоўчае расследаванне па другой справе тычыцца магчымага перавышэння паўнамоцтваў супрацоўнікамі паліцыі.

«У рамках праведзенага расследавання будзе даследавацца абгрунтаванасць і правільнасць правядзення ўмяшання», — паведамілі ў пракуратуры.

У якім стане быў беларус

Беларускі бок лічыць, што мужчына быў у вельмі цяжкім стане, што, зрэшты, не перашкодзіла яму дабрацца з захаду Польшчы да мяжы з Беларуссю.

Пра інцыдэнт, без пазначэння нацыянальнасцяў кіроўцаў, расказваў польскі тэлеканал TVN. У сюжэце адзначалася, што

«кіроўца атрымаў раненні. Супрацоўнікі аказалі яму першую медыцынскую дапамогу і выклікалі хуткую дапамогу, якая даставіла параненага кіроўцу ў бальніцу. Раненні не пагражалі яго жыццю».

• 1
• 0
• 2
• 2
• 0
• 0
• 0
• 0