«Дзе яшчэ ў Еўропе мы можам знайсці 110 брыгад?» Швецыя падтрымлівае ўступленне Украіны ў НАТА
Выступаючы 23 мая на форуме GLOBSEC у Празе, міністр абароны Швецыі Пол Юнсан заявіў, што ягоная краіна падтрымлівае будучае членства Украіны як у НАТА, так і ў Еўрапейскім саюзе, дадаўшы, што Кіеву павінна быць дадзена доўгатэрміновая еўраатлантычная перспектыва. Ён упэўнены, што загартаваныя ў баях узброеныя сілы Кіева і абаронная прамысловасць, якая хутка расце, умацуюць НАТА, нягледзячы на апазіцыю з боку некаторых краін-членаў, піша Politico.
«Усе еўрапейскія краіны павінны мець права на ўступленне ў НАТА як такое, калі яны адпавядаюць патрабаванням, — сказаў Юнсан, спасылаючыся на палітыку адчыненых дзвярэй альянсу. — Не павінна быць нікога, хто мае права вета супраць гэтага. Гэта наша пазіцыя».
Пытанне пра будучыню Украіны ў НАТА застаецца адным з самых адчувальных унутры альянсу. Некалькі саюзнікаў падтрымліваюць захаванне дзвярэй адчыненымі для Кіева, у той час як іншыя асцерагаюцца, што занадта хуткі рух можа абвастрыць напружанасць з Расіяй або ўцягнуць непасрэдна НАТА ў актыўную вайну.
Юнсан прызнаў, што сярод саюзнікаў няма кансенсусу.
«Я прызнаю, што ёсць саюзнікі, якія выступаюць супраць гэтага, — сказаў ён. — Але калі вы спытаеце мяне пра нашу пазіцыю, то наша пазіцыя такая».
Шведскі міністр разглядае Украіну як будучы чыннік бяспекі для Еўропы. Ён звяртае ўвагу на маштаб Узброеных сіл Украіны, яе інавацыі ваеннага часу і патэнцыял абароннай прамысловасці як на прычыны для набліжэння краіны да НАТА.
«Дзе яшчэ ў Еўропе мы можам знайсці 110 брыгад? — запытаў Юнсан. — Дзе яшчэ ў Еўропе мы можам знайсці інавацыйную сістэму, якую забяспечыла Украіна? Дзе яшчэ мы можам знайсці таксама і прамысловы патэнцыял?»
Шведскі міністр абароны таксама сцвярджае, што абаронны рынак Украіны стаў адным з самых эфектыўных у Еўропе, заявіўшы, што Кіеў правёў дэрэгуляцыю, прыватызацыю і адкрыў канкурэнцыю пасля поўнамаштабнага ўварвання Расіі, што дазволіла яму павялічыць вытворчасць зброі з дзівоснай хуткасцю.
Прэзідэнт Чэхіі заклікаў НАТА «сабрацца з сіламі і паказаць зубы»
Рубіа: Перадыслакацыя амерыканскіх войскаў — «не пакаранне»
Прэзідэнт Фінляндыі: ЗША не могуць сабе дазволіць выйсці з НАТА, што б ні гаварыў Трамп
Генсак НАТА прапанаваў членам альянсу выдзяляць на дапамогу Украіне па 0,25% ВУП
Колькасць войска Канады расце самымі хуткімі тэмпамі за 30 гадоў. Прычына не толькі ў Трампе
Каментары