Серэна Уільямс вяртаецца ў вялікі тэніс і згуляе на турніры ў Лондане
Легендарная амерыканская тэнісістка, 44‑гадовая Серэна Уільямс вернецца ў вялікі тэніс і выступіць у чэрвені ў парным разрадзе на прэстыжным турніры WTA 500 у лонданскім Queen’s Club. Пра гэта абвясцілі арганізатары турніру, піша ВВС.
«23‑разовая пераможца турніраў Вялікага шлема ў адзіночным разрадзе Серэна Уільямс абвясціла сёння пра сваё вяртанне ў прафесійны тэніс; яе дэбют адбудзецца гэтым летам на турніры HSBC Championships в Лондане», — гаворыцца ў паведамленні арганізатараў.
Уільямс не з’яўлялася на корце з моманту паразы ў трэцім раўндзе US Open у 2022 годзе.
Турнір пачнецца 8 чэрвеня. Арганізатары далі Уільямс уайлд-кард. Мяркуецца, што яна згуляе ў пары з 19‑гадовай канадскай тэнісісткай Вікторыяй Мбока.
«Queen’s Club падаецца ідэальным месцам для пачатку гэтага новага раздзелу. Травяное пакрыццё падарыла мне адны з самых значных момантаў у маёй кар’еры, і я рада вярнуцца да спаборніцтваў на адной з самых знакавых пляцовак гэтага віду спорту», — цытуюць арганізатары саму Уільямс.
Чуткі пра вяртанне Серэны пачалі цыркуляваць яшчэ летась, калі яе імя з’явілася ў спісе гульцоў, якія зарэгістраваліся на допінг-кантроль.
У панядзелак яна апублікавала ў сацсетках відэа, на якім яна ідзе на корт, з подпісам: «Напэўна, усе ўжо чулі навіну».
За 27 гадоў выступленняў Серэна Уільямс перамагла на 23 турнірах Вялікага шлема, і гэта — рэкорд Адкрытай эры ў тэнісе, якая пачалася ў 1968 годзе. Да гэтага 24 перамогі атрымала аўстралійка Маргарэт Корт.
Акрамя адзіночных тытулаў, Серэна разам з сястрой Вінус выйграла 14 турніраў Вялікага шлема ў парным разрадзе. Акрамя таго, сёстры ў пары тройчы перамагалі на Алімпійскіх гульнях, а ў Лондане ў 2012 годзе Серэна дадала да гэтай калекцыі і золата ў адзіночным разрадзе.
Праз тры тыдні пасля турніру ў лонданскім Queen’s Club пачнецца Уімблдон. Каб згуляць і на гэтым турніры, калі яна гэтага захоча, Серэне зноў спатрэбіцца уайлд-кард, але, цалкам магчыма, арганізатары Уімблдона будуць рады зноў убачыць суперзорку на сваіх кортах.
Трохразовы пераможца Уімблдона Джон Макінрой сказаў, што гэта, на яго думку, было б лагічным наступным крокам.
«Калі Серэна Уільямс, найвялікшая тэнісістка ўсіх часоў, вяртаецца, то яна вяртаецца не для таго, каб проста пагуляць — яна хоча зноў выйграць турнір-мэйджар, — сказаў Макінрой. — Ніякіх іншых прычын для яе вяртання ў тэніс я выказаць не магу».
Цяпер чытаюць
Каб не плаціць падатак на сабак, мінчукі пачалі здаваць іх у пункты адлову16
Каментары