Калапс у небе: «Аэрафлот» адмяніў ужо трэці рэйс у Мінск, «Белавія» таксама змяняе расклад
Масіраваная атака беспілотнікаў на Маскоўскі рэгіён раніцай 18 чэрвеня прывяла да сур'ёзных збояў у авіязлучэнні паміж сталіцамі Расіі і Беларусі.
Як паведамляе БЕЛТА са спасылкай на анлайн-табло перавозчыка, расійская кампанія «Аэрафлот» адмяніла ўжо трэці за дзень парны рэйс Масква — Мінск — Масква.
Гэтым разам пад скасаванне патрапіў вечаровы рэйс SU1832 з Шарамецьева (вылет у 18:40) і, адпаведна, зваротны з беларускай сталіцы (у 21:10). Раней былі адмененыя яшчэ два дзённыя самалёты «Аэрафлота».
Акрамя таго, рэйс SU1836 затрыманы больш чым на 5 гадзін і вылеціць з Масквы толькі а 20‑й вечара. Зваротны рэйс SU1837 вылеціць з Мінска ў 22.20 замест 17.20.
Авіякампанія просіць пасажыраў скасаваных рэйсаў не прыязджаць у аэрапорт і пераафармляць квіткі дыстанцыйна.
На змены ў маскоўскіх аэрапортах вымушана адрэагавала і беларуская «Белавія». Перавозчык ужо скарэктаваў час вылету асобных сённяшніх рэйсаў. Нягледзячы на тое, што на дадзены момант абмежаванні на палёты ў Маскве знятыя, у «Белавія» папярэдзілі, што хістанні ў раскладзе могуць захавацца і ў пятніцу, 19 чэрвеня.
Пасажырам рэкамендуюць правяраць статус сваіх вылетаў на сайце беларускай кампаніі перад адпраўкай у аэрапорт.
Цяпер чытаюць
Лукашэнка загадаў забараніць арганізаваныя паездкі дзяцей за мяжу без дазволу дзяржавы15
Каментары