Звычайнае затрыманне за п’янку на вуліцы скончылася для гамельчука тэрмінам за напад на міліцыянта, піша «Белка».
Два сябры выпівалі каля дома. Абураныя жыхары патэлефанавалі ў міліцыю, і на месца выехаў нарад. Мужчын, якія былі ўжо добра п’яныя, затрымалі.
Падчас пасадкі ў службовы аўтамабіль адзін з затрыманых паспрабаваў ударыць міліцыянера нагой, але той ухіліўся. А ўжо на ганку Навабеліцкага РАУС, куды яго даставілі, ён падставіў падножку супрацоўніку міліцыі, ад чаго той упаў і пашкодзіў калена.
Суд Навабеліцкага раёна прызнаў мужчыну вінаватым у гвалце і пагрозе гвалтам у дачыненні да супрацоўнікаў праваахоўных органаў. Ён асуджаны да двух з паловай гадоў пазбаўлення волі ў калоніі ўзмоцненага рэжыму. Таксама ён павінен выплаціць супрацоўніку, які ўпаў на ганку, кампенсацыю маральнай шкоды ў памеры 300 рублёў, паведаміла памочнік пракурора горада Гомеля Яўгенія Маркавец.
Таксама за знаходжанне ў грамадскім месцы ў стане ап’янення, а таксама за абразы на адрас міліцыянераў мужчына апынуўся ў ізалятары на восем сутак і быў аштрафаваны на 20 базавых велічынь.
Каментары