Прадстаўнік урада Венесуэлы правёў першую сустрэчу з прадстаўнікамі апазіцыі, каб намеціць дарожную карту дыялогу аб пераходзе да дэмакратыі.
Учора, 18 чэрвеня, адбылася сустрэча кіраўніка Нацыянальнай асамблеі Хорхе Радрыгеса і былой дэпутаткі ад апазіцыі Дзіноры Фігеры, якая напярэдадні вярнулася ў Каракас пасля васьмі гадоў выгнання, піша Telesurtv.net.
У афіцыйнай заяве, апублікаванай Радрыгесам, гаворыцца, што сустрэча прызначана для правядзення палітычнага дыялогу.
«На гэтай нарадзе быў прызначаны сумесны тэхніка-палітычны камітэт, парадак дня якога ўключае канкрэтныя этапы і тэрміны, што садзейнічаюць умацаванню дэмакратыі, кансалідацыі міру і пабудове будучага дабрабыту і працвітання для венесуэльцаў», — гаворыцца ў заяве Хорхе Радрыгеса.
Як паведамілі ў Дзярждэпартаменце ЗША, парадкам дня сустрэчы быў палітычны дыялог пра дэмакратычны пераход.
Гэты парадак дня ўключае аднаўленне дэмакратычных інстытутаў Венесуэлы, умацаванне Нацыянальнага палітычнага форуму, аднаўленне надзейных гарантый палітычнага ўдзелу і забеспячэнне асноўных грамадзянскіх свабод для адкрытага палітычнага дыялогу.
Дзярждэпартамент ЗША таксама лічыць гэта «першым крокам у тым, што стане прадуманым працэсам па стварэнні свабоднага і адкрытага венесуэльскага грамадства».
Хорхе Радрыгес — брат часовай прэзідэнткі краіны Дэлсі Радрыгес, якая прыйшла да ўлады пасля таго, як спецназ ЗША 3 студзеня выкраў Нікаласа Мадура.
65‑гадовая Фігера, член партыі «Справядлівасць перадусім», узначальвала Нацыянальную асамблею ў 2015 годзе, а ў 2018‑м пакінула краіну, як лічаць у ЗША, з-за «пагроз і пераследу». Пасля вяртання яна дыстанцыявалася ад лідаркі апазіцыі і лаўрэаткі Нобелеўскай прэміі міру Марыі Карыны Мачада, якая нядаўна выступіла з уласнай ініцыятывай па правядзенні такіх перамоў.
Каментары
У Венесуэле апазыцыя перамагла у 2016 годзе прайшло 10 год ...