Паводле даных еўрапейскай службы Copernicus, тэмпература паверхні Сусветнага акіяна дасягнула рэкорднага ўзроўню для гэтага часу года і перасягнула паказчыкі, зафіксаваныя ў 2023 і 2024 гадах, паведамляе The Guardian.
21 чэрвеня за межамі палярных рэгіёнаў была адзначаная самая высокая тэмпература паверхні акіяна за ўсю гісторыю назіранняў для гэтай даты. Навукоўцы лічаць, што такое пацяпленне можа істотна паўплываць на надвор'е, глабальны клімат і стан марскіх экасістэм.
Асаблівую занепакоенасць выклікае і магчымы пачатак моцнай фазы з'явы Эль-Ніньё. Паводле прагнозаў, яна можа стаць адной з наймацнейшых за апошнія дзесяцігоддзі, што яшчэ больш узмоцніць глабальнае пацяпленне.
Папярэдні рэкорд тэмпературы паверхні акіяна, усталяваны ў чэрвені 2023 года, папярэднічаў перыяду экстрэмальнай спёкі, паводак і моцных штормаў у розных краінах свету. Цяпер гэты паказчык ужо пераўзыдзены.
Даследчыкі нагадваюць, што Сусветны акіян паглынае больш за 90 працэнтаў лішняга цяпла, якое назапашваецца ў кліматычнай сістэме Зямлі. Галоўнай прычынай гэтага яны называюць выкарыстанне выкапнёвага паліва, а сам працэс награвання акіяна працягвае паскарацца.
У той жа час навукоўцы адзначаюць, што пакуль рана рабіць канчатковыя высновы, бо самыя высокія тэмпературы паверхні акіяна звычайна назіраюцца ў ліпені і жніўні. Аднак спецыялісты не выключаюць, што спалучэнне ўжо рэкорднага нагрэву акіяна і развіцця Эль-Ніньё можа прывесці да новых тэмпературных рэкордаў у найбліжэйшыя месяцы.
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс15
Каментары