У еўракубкавым футбольным матчы гол забіў бязрукі футбаліст. Сам ён інвалідам сябе не лічыць

Клуб Марыуса Лінда «Рунавік» з Фарэрскіх астравоў, гуляючы ў матчы ў адказ перамог славенскі «Капер» з лікам 3:1. У першай сустрэчы фарэрская каманда саступіла 0:2, але змагла адыграцца і ў выніку прайсці далей пасля серыі пенальці. А другі гол «Рунавіка» забіў менавіта Лінд.

Такім чынам, ён стаў другім у гісторыі футбалістам без адной рукі, якому ўдалося забіць у еўракубках. Да гэтага амаль 63 гады адзіным такім гульцом лічыўся паўночнаірландзец Джымі Хэйтс, які забіваў за клуб «Дандалк» у Кубку еўрапейскіх чэмпіёнаў.

Для «Рунавіка» гэты поспех таксама стаў гістарычным: клуб упершыню выйшаў у трэці раўнд кваліфікацыі Лігі канферэнцый. Наступным супернікам фарэрскай каманды будзе швейцарскі «Лугана».

Павялічыць

Лінд з'яўляецца важным футбалістам «Рунавіка». У чэмпіянаце Фарэрскіх астравоў ён у 16 матчах забіў чатыры мячы і зрабіў чатыры галявыя перадачы. Чакаецца, што ў наступных матчах ён таксама будзе выходзіць у асноўным складзе.

Футбольны шлях Лінда пачаўся ў Даніі. Ён займаўся ў акадэміі «Вестшэлана» з горада Слагелсэ, дзе трэнераў бянтэжыла ягоная фізічная асаблівасць, нягледзячы на добрую хуткасць і тэхніку. Калі футбаліст стаў набліжацца да прафесійнага ўзроўню, з ім развіталіся, паабяцаўшы дапамагчы з працаўладкаваннем.

Пазней Лінд далучыўся да клуба «Слагелсэ» і прабіўся ў асноўную каманду. Ён нават наняў спецыяльнага трэнера, каб палепшыць баланс і сілу цягліц, а таксама знайшоў трэніровачны пратэз, які дазваляў паўнавартасна займацца сілавой падрыхтоўкай. Аднак пасля выхаду «Слагелсэ» ў вышэйшы дывізіён клуб не стаў працягваць з ім кантракт.

У 2022 годзе Лінд пераехаў на Фарэрскія астравы. Спачатку ён выступаў за клуб «Аргір», затым за «Б-36 Торсхаўн», а ў студзені 2026 года падпісаў кантракт з «Рунавiкам».

Сам футбаліст не лічыць адсутнасць правага перадплечча інваліднасцю і не хоча, каб яго ўспрымалі як гульца, якому робяць выключэнне са спагады.

Павялічыць

Ён падкрэсліваў, што гэта проста фізічная асаблівасць і яна матывуе яго працаваць яшчэ больш — як на футбольным полі, так і па-за ім. Паводле яго слоў, ён ніколі не лічыў сябе горшым за футбалістаў з дзвюма рукамі. Калі ён саступае камусьці, то толькі праз недастатковую тэхніку, хуткасць ці іншыя спартыўныя якасці, а не праз адсутнасць рукі.

У інтэрв'ю ў 2025 годзе Лінд таксама казаў, што марыць гуляць супраць наймацнейшых камандаў. Пры гэтым ён не хоча атрымліваць месца ў камандзе толькі дзякуючы сваёй асаблівасці. Ён лічыць сябе перш за ўсё спартсменам і ўпэўнены, што месца ў складзе трэба заслужыць пастаяннымі трэніроўкамі і працай над сабой.

• 8
• 0
• 0
• 0
• 0
• 0
• 0
• 1