«Хуліганства з выкарыстаннем зброі». Новы інцыдэнт з беларусам-добраахвотнікам ва Украіне
Калі яму прапанавалі пакласці зброю і здацца, беларус зрабіў яшчэ адзін стрэл з аўтамата. Перамовы з ім вялі больш за чатыры гадзіны.
У Харкаве паводле падазрэння ў хуліганстве з выкарыстаннем аўтамата і гранаты ў жылым доме ўзялі пад варту ўраджэнца Мінска, грамадзяніна Беларусі, які служыць разведчыкам у замежным легіёне Галоўнага ўпраўлення выведкі Міністэрства абароны Украіны.
За краты беларус трапіў 20 жніўня, але можа выйсці пад так званыя «асабістыя абавязкі», калі сплаціць 266 240 грыўняў закладу (амаль 6 тысяч даляраў), піша Радыё Свабода.
Сваёй віны беларускі добраахвотнік не прызнае. Сцвярджае, што ўсё адбылося ў межах самаабароны ад невядомых, якія на яго напалі. Яго адвакат назваў падазрэнне неабгрунтаваным.
Абмежаванні на свабоду перамяшчэння беларуса будуць дзейнічаць сама менш да 18 кастрычніка.
Беларускаму вайскоўцу выставілі падазрэнне паводле ч. 4 артыкула 296 Крымінальнага кодэкса Украіны — хуліганства, то-бок грубае парушэнне грамадскага парадку з выкарыстаннем агнястрэльнай зброі. Яму пагражае ад трох да сямі гадоў пазбаўлення волі.
Інцыдэнт адбыўся 20 жніўня ў Харкаве на першым паверсе двухпавярховага жылога дома ў прыватным сектары горада.
Як вынікае з матэрыялаў справы, уначы, прыблізна а 01:30, жыхары пачулі ў пад'ездзе гучныя крыкі мужчыны, які меў з сабой аўтамат з набітым магазінам і боепрыпасы. Потым адбыўся выбух, з вокнаў пасыпалася шкло. Сцвярджаецца, што беларус нібыта кінуў у пад'езд гранату. На месца выклікалі паліцыю.
Прыехалі прадстаўнікі патрульнай паліцыі, а таксама двух спецыяльных падраздзяленняў КОРД (Корпус аператыўна-раптоўнага дзеяння Нацыянальнай паліцыі Украіны) і ТОР (спецыяльнае падраздзяленне «Тактычна-аператыўнае рэагаванне» ў складзе патрульнай паліцыі).
Калі яму прапанавалі пакласці зброю і здацца, беларус зрабіў яшчэ адзін стрэл з аўтамата. Перамовы з ім вялі больш за чатыры гадзіны. У выніку ён дастаў магазін з аўтамата, паклаў зброю на зямлю, падняў рукі ўверх, пасля чаго вайскоўцы спецыяльнага падраздзялення затрымалі яго.
Ніякіх іншых дэталяў не вядома. Зброю, якую знайшлі на месцы інцыдэнту, — аўтамат, 17 патронаў і запал ад гранаты — прызналі рэчавымі доказамі ў справе.
Цяпер чытаюць
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў43
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1616
Каментары