Амерыканскія разведвальныя службы папярэджваюць, што Расія пачала новую лічбавую кампанію ўплыву напярэдадні лістападаўскіх выбараў у ЗША. Паводле сакрэтных ацэнак, мэтай Крамля з'яўляецца ўзмацненне ўнутраных супярэчнасцяў у амерыканскім грамадстве. Амерыканскія чыноўнікі, знаёмыя з матэрыяламі разведкі, расказалі пра гэта The New York Times на ўмовах ананімнасці.
У апошнія тыдні спецыялісты па расійскай дэзынфармацыі выявілі некалькі кампаній у сацыяльных сетках, у якіх з дапамогай штучнага інтэлекту ствараліся падробленыя відэа з удзелам галівудскіх знакамітасцяў. У іх знакамітасці нібыта абмяркоўвалі важныя выбары ў Сенат у штатах з асабліва напружанай барацьбой.
Пры гэтым цяперашняя кампанія, паводле амерыканскіх чыноўнікаў, менш маштабная і менш скаардынаваная, чым некаторыя папярэднія спробы Расіі паўплываць на выбары ў ЗША. Паводле ацэнак разведкі, з 2016 года Крэмль праводзіў інтэрнэт-аперацыі ўплыву падчас кожнага федэральнага выбарчага цыклу.
Цяпер амерыканскія спецслужбы лічаць, што Масква менш зацікаўленая ў прамежкавых выбарах, чым у прэзідэнцкіх, а частку яе ўвагі адцягвае вайна супраць Украіны.
Чыноўнікі сцвярджаюць, што асноўная мэта цяперашняй кампаніі — стварыць хаос, а не дапамагчы канкрэтнай партыі. Аднак незалежныя даследчыкі дэзынфармацыі ў апошнія тыдні звязвалі з Расіяй прыклады нападаў менавіта на кандыдатаў ад Дэмакратычнай партыі ў штатах, дзе чакаецца вострая барацьба.
У сацыяльных сетках X і BlueSky на працягу апошняга тыдня ў дзве хвалі з'явілася серыя відэа, створаных з дапамогай штучнага інтэлекту. Яны выкарыстоўваліся для масавага распаўсюджвання неабгрунтаваных абвінавачанняў супраць дэмакратаў, якія балатуюцца ў Сенат. У матэрыялах выкарыстоўваліся тэмы, якімі Дональд Трамп і Рэспубліканская партыя крытыкуюць дэмакратаў, у тым ліку абвінавачанні ў карупцыі, антысемітызме і падтрымцы правоў ЛГБТ.
Некаторыя відэа былі змантаваныя так, каб ствараць уражанне, нібыта яны паходзяць ад вядомых СМІ, у тым ліку CNN, BBC і The New York Times. Сярод мішэняў былі кандыдаты, якія могуць паўплываць на суадносіны сіл у Сенаце.
У адным з апошніх допісаў было выкарыстана падробленае відэа The Times, у якім актрыса Джэймі Лі Кёрціс нібыта крытыкавала дэмакратаў за іх палітыку ў дачыненні да трансгендарных людзей. Прэс-сакратарка актрысы Гайдзі Шэфер заявіла, што ў гэтым відэа «няма ні кроплі праўды». Паводле даных X, да канца дня допіс прагледзелі амаль 200 тысяч разоў.
Даследчыкі адзначаюць, што ў гэтай кампаніі выкарыстоўваюцца расійскія метады, вядомыя па папярэдніх выбарах у ЗША і Еўропе. Старэйшы даследчык кампаніі Graphika Жан Ле Ру заявіў, што амерыканскі кантэнт пачаў з'яўляцца неўзабаве пасля заканчэння выбараў у Германіі і Швецыі. Паводле яго, можна чакаць пашырэння кампаніі, якая, на яго думку, цяпер засяроджваецца на выбарах у ЗША.
Graphika мяркуе, што за аперацыяй могуць стаяць звязаныя з Крамлём сеткі Operation Overload або Matryoshka. Іх боты часта выдаюць сябе за сапраўдныя навінавыя арганізацыі, каб распаўсюджваць сфабрыкаваныя матэрыялы.
Амерыканская разведка таксама робіць ацэнкі, паводле якіх у аперацыях уплыву напярэдадні выбараў можа ўдзельнічаць Іран, але яго актыўнасць пакуль невысокая. Акрамя таго, Кітай, паводле амерыканскіх чыноўнікаў, можа быць гатовы праводзіць аперацыі, накіраваныя супраць асобных кандыдатаў у Кангрэс або дзейных кангрэсменаў, якіх Пекін лічыць варожымі да Кітая.
Цяпер чытаюць
Ціханоўскі адказаў Ціханоўскай: Чамусьці не згадваецца, што рэабілітацыя сына адбывалася ў кватэрах і дамах, якія я купіў107
Каментары