Настаўніку матэматыкі сярэдняй школы №5 Смалявічаў Дзянісу Дубаневічу ў Палацы Рэспублікі ўручылі галоўны прыз конкурсу «Настаўнік года — 2026» — «Вялікага крыштальнага жураўля» і ключы ад новага аўтамабіля Geely. Ён перамог у рэспубліканскім конкурсе прафесійнага майстэрства, піша БелТА.
Дубаневіч расказаў, што падрыхтоўка да конкурсу заняла амаль год. На гэтым шляху яго падтрымлівалі сям'я, калегі і абласны інстытут развіцця адукацыі. У рэспубліканскім конкурсе ён удзельнічаў другі раз. У 2014 годзе настаўнік заняў першае месца на раённым этапе, але не прайшоў далей.
Гэтым разам ён не адразу пагадзіўся на прапанову дырэктара паўторна ўдзельнічаць у конкурсе, але ў выніку вырашыў паспрабаваць. Паводле яго слоў, конкурс стаў для яго магчымасцю пазнаёміцца з высокакваліфікаванымі спецыялістамі і прафесіяналамі ў сваёй справе.
Настаўнікам матэматыкі Дубаневіч стаў па прыкладзе сваёй маці, якая выкладае гэты прадмет амаль 50 гадоў. Сярод вынікаў яго працы — вучні, якія атрымлівалі дыпломы на заключным этапе рэспубліканскай алімпіяды, перамагалі ў абласных, рэспубліканскіх і міжнародных навукова-практычных канферэнцыях. Трое яго вучняў атрымалі па 100 балаў на цэнтралізаваным экзамене і цэнтралізаваным тэсціраванні.
Галоўным прынцыпам у працы з дзецьмі Дубаневіч называе паважлівае стаўленне да вучняў. Ён лічыць, што дзіця павінна мець права на памылку.
Настаўнік таксама адзначае, што сучасны педагог павінен пастаянна сачыць за тым, што цікавіць дзяцей, і ісці ў нагу з часам. Новыя гаджэты і тэхналогіі з'яўляюцца вельмі хутка, таму настаўніку неабходна быць гатовым размаўляць з вучнямі і на гэтыя тэмы.
Пры гэтым, паводле яго слоў, адмаўляцца ад традыцыйных педагагічных метадаў не варта. Многія з іх прайшлі выпрабаванне часам, але іх неабходна адаптаваць да сучасных умоў.
Цяпер чытаюць
Ціханоўскі: Ціханоўскай можна было ў 2020‑м не пабаяцца турмы. І, можа, у беларусаў быў бы шанец135
Каментары