Памёр брытанскі акцёр Патрык Сцюарт, вядомы па ролях капітана Жана-Люка Пікара ў серыяле «Зорны шлях» і прафесара Чарльза Ксаўе ў франшызе «Людзі Ікс». Яму было 86 гадоў. Пра смерць акцёра паведаміў часопіс The Hollywood Reporter.
Па словах яго шматгадовай прадстаўніцы Кэлі Буш Новак, Сцюарт памёр у сераду ў сябе дома ў Лос-Анджэлесе. У апошні час ён змагаўся з хваробай Альцгеймера і дэменцыяй з цельцамі Леві. Сваякі акцёра папрасілі замест кветак на яго магілу ахвяраваць грошы на даследаванні хваробы Альцгеймера ва ўніверсітэце Джонса Хопкінса.
Патрык Сцюарт нарадзіўся ў 1940 годзе ў англійскім горадзе Мірфілд. Ён скончыў тэатральную школу Bristol Old Vic, а ў 26 гадоў далучыўся да Каралеўскай шэкспіраўскай кампаніі. Да канца 1980‑х гадоў акцёр ужо меў шматгадовы досвед працы на класічнай тэатральнай сцэне.
Сусветную вядомасць яму прынесла роля капітана Жана-Люка Пікара ў серыяле «Зорны шлях: Наступнае пакаленне». Спачатку стваральнік франшызы Джын Радэнбэры не хацеў бачыць брытанскага акцёра з лысінай у ролі галоўнага героя, але прадзюсар Роберт Джастман настаяў на тым, каб Сцюарт прайшоў праслухоўванне.
Акцёр падпісаў кантракт на шэсць гадоў, хоць сам сумняваўся, што серыял пратрымаецца нават адзін сезон. Аднак праект выходзіў на працягу сямі сезонаў і завяршыўся ў 1994 годзе. Пасля гэтага з’явіліся яшчэ чатыры поўнаметражныя фільмы пра «Зорны шлях» з удзелам Сцюарта.
У 2000 годзе ён сыграў прафесара Чарльза Ксаўе ў фільме «Людзі Ікс». Яго партнёрам стаў Іэн Мак-Келен, які выканаў ролю Магнета. Усяго Сцюарт зняўся ў сямі фільмах гэтай франшызы, у тым ліку ў стужцы «Логан», якая выйшла ў 2017 годзе.
Акцёр казаў, што захапляўся абодвума сваімі вядомымі героямі — Пікарам і Ксаўе — за іх маральныя прынцыпы, дабрыню, чуласць і спагаду.
У 2010 годзе каралева Лізавета II пасвяціла Сцюарта ў рыцары. У 2020 годзе ён зноў вярнуўся да ролі капітана Пікара ў серыяле «Зорны шлях: Пікар».
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна40
Каментары