Фестываль нацыянальных культур праходзіць у Беларусі кожныя 2 гады. Ён стартуе ў раёнах, праходзяць абласныя конкурсы, сталіцай жа фінальных мерапрыемстваў па традыцыі становіцца Гродна. Сваю культуру, традыцыі на фестывалі дэманструюць прадстаўнікі народаў свету, якія знайшлі другую радзіму ў Беларусі.
Паводле слоў намесніка старшыні Гродзенскага гарвыканкама Ірыны Сенчанкавай, з году ў год расце колькасць удзельнікаў мерапрыемства - нацыянальных аб'яднанняў, творчых калектываў і гасцей. Калі ў першым фестывалі прымалі ўдзел 11 нацыянальных аб'яднанняў, то ў гэтым годзе ў Гродне можна будзе азнаёміцца з культурай і традыцыямі 33 нацыянальнасцей. Упершыню адкрыюцца падворкі венесуэльцаў, іспанцаў, цэлым аб'яднаннем будуць прадстаўлены туркмены, другі год запар у Гродне размесціцца падворак галандцаў.
У розных эпізодах свята прымуць удзел амаль 2 тыс. гасцей.Гэта артысты, народныя майстры, прадстаўнікі дыпламатычнага корпуса розных дзяржаў, беларускіх дыяспар за мяжой, дэлегацыі гарадоў-пабрацімаў. Можна будзе ўбачыць тэатралізаванае шэсце ўдзельнікаў, наведаць горад майстроў, пленэры, выстаўкі, святы нацыянальных адзінаборстваў, шматлікія канцэрты.
Асноўная ўвага гасцей фестывалю па традыцыі прыкавана да нацыянальных падворкаў. У гэтым годзе яны размесцяцца на 25 пляцоўках у межах гістарычнага цэнтра горада (некаторыя аб'яднанні стануць суседзямі на адной пляцоўцы). Падарожнічаючы па падворках, можна будзе азнаёміцца з культурнай спадчынай, песнямі, танцамі, касцюмамі, кухняй народаў свету. Некалькі фестываляў запар рэжысёры прапануюць аб'яднанням пазнаёміць гасцей з тым або іншых абрадам іх народа. У гэтым годзе аб'яднанні будуць прадстаўляць свае вясеннія абрады.
У канцэртах пад адкрытым небам разам з вядомымі беларускімі выканаўцамі і калектывамі ў Гродне выступяць румынская група Morandi (1 чэрвеня) і французская Ottawan (2 чэрвеня).
У гэтым годзе адкрыццё і закрыццё свята пройдзе на плошчы Савецкай, якая ўмяшчае да 30 тыс. гледачоў.
Фестываль нацыянальных культур збліжае і аб'ядноўвае ўсе нацыянальныя меншасці, якія пражываюць на тэрыторыі Беларусі, садзейнічае захаванню нацыянальнай самабытнасці і разам з тым узаемаразуменню і ўзаемнаму ўзбагачэнню культур. Па свайму фармату фестываль не мае аналагаў у свеце.
Каментары