Блогер Сярога з Расіі прыехаў на Зыбіцкую з каханай блогеркай Анечкай. Вынік: збіты ім беларус у коме, а Сярога на 5,5 года за кратамі
Сярога аказаўся майстрам спорту па боксе і з аднаго ўдару ледзь не забіў выпадковага прахожага. Яго нявеста цяпер абвінавачвае сваякоў ахвяры ў вымагальніцтве.
Анечка — гэта расійская лайфстайл-блогерка Ганна Парамонава. На яе інстаграм падпісана 346 тысяч чалавек, на тэлеграм-канал — 400 тысяч, на тыкток — 1,3 мільёна. Сяргей Цімафееў, яе хлопец, таксама блогер. У яго 205 тысяч падпісчыкаў у тыктоку.
У пары таксама ёсць агульны YouTube-канал «Анечка і Сярога» (амаль 15 тысяч падпісчыкаў). А яшчэ каля 109 тысяч падпісчыкаў на іх агульным акаўнце ў тыктоку.
Год таму Сярога зрабіў каханай прапанову рукі і сэрца ў Анапе — адбылося гэта падчас палёту на паветраным шары. Пара шмат распавядала пра падрыхтоўку да вяселля. Але цяпер усе планы на паўзе, бо хлопец трапіў у Беларусі за краты.
Пачалося ўсё сёлета 8 сакавіка. Расійскія блогеры прыляцелі ў Мінск, каб разам з сябрамі патусіць на Зыбіцкай. А скончылася трагедыяй.
Вось што пра канфлікт пісалі ў дзяржаўных медыя.
Гуляючы ўначы па набярэжнай, кампанія (Сяргей апісаны як 21‑гадовы беспрацоўны замежнік) турыстаў пабачыла двух маладзёнаў, якія былі апрануты не па сезоне. Пачатак сакавіка, а хлопцы стаялі ў майках. Плюс да таго, адзін з іх нават без красовак.
Нехта з кампаніі турыстаў падаў абутак небараку і пажартаваў, што трэба апранацца з улікам сезону. Ледзь апранутыя хлопцы ў адказ «папрасілі пакінуць сваё меркаванне пры сабе».
Такая парада давяла Сярогу да шаленства. Пачуўшы непрыемныя словы, Сярога (які між іншым займаўся боксам) ударыў кулаком няветлівага суразмоўцу. Аднаго ўдару хапіла — хлопец упаў на асфальт і страціў прытомнасць. За яго паспрабаваў заступіцца сябар — але таксама атрымаў удар у галаву і ўпаў на зямлю.
Далей з’явіўся АМАП, які затрымаў удзельнікаў канфлікту. Аднаго з пацярпелых забрала хуткая дапамога — ім быў 29‑гадовы беларус Андрэй Сцепанчук, які атрымаў вельмі цяжкую траўму галавы і мозгу. Ён трапіў у кому.
Супраць Сярогі завялі крымінальную справу па двух артыкулах: ч. 2 арт. 147 КК (наўмыснае прычыненне цяжкага цялеснага пашкоджання з хуліганскіх пабуджэнняў) і ч. 1 арт. 339 КК (хуліганства).
Віну баксёр цалкам прызнаў.
Анечка ж у сваім тэлеграм-канале канфлікт апісвае так.
Па яе словах, 8 сакавіка кампанія добра адсвяткавала на Зыбіцкай. Маладыя людзі ішлі да таксі, калі раптам пабачылі двух відавочна п’яных хлопцаў без верхняга адзення — тыя стаялі басанож на снезе: «Як любыя адэкватныя людзі, мы не маглі прайсці міма. Падалі ім абутак, спыталі, дзе іх курткі, хацелі выклікаць ім таксі дадому. На што атрымалі адказ: «Пайшлі вы нах*й адсюль, вас гэта я*аць не павінна».
Блогерка пераконвае: незнаёмцы першыя пачалі штурхацца, а таго моманту, калі яе каханы адным ударам ледзь не забіў чалавека, яна не бачыла. Маўляў, толькі потым на відэа з камер назірання.
Анечка запэўнівае: Сярога ўжо кінуўся дапамагаць Андрэю і сам хацеў выклікаць хуткую — але перашкодзіў АМАП.
Дзяўчына абвінавачвае родных хлопца, які і па сёння знаходзіцца ў коме, у вымагальніцтве: «Я і сваякі Сярожы неаднаразова ляталі ў Мінск, дамаўляліся аб сустрэчах, трацілі вельмі шмат грошай на пералёты, каб пасля прылёту нам сказалі: «Нам няма пра што з вамі размаўляць, купляйце трохпакаёвую кватэру — і тады ўсё будзе добра». Мы ж прапаноўвалі лячэнне ў найлепшых клініках Еўропы. Сям’я хлопца заявіла, што ім патрэбная кватэра. Канечне, такіх грошай у мяне не аказалася».
Блогерка сцвярджае, што аплаціла першую аперацыю Андрэю (прыблізна $19500), прапаноўвала аплаціць другую (у два разы даражэйшую) у маскоўскай клініцы, але родныя быццам бы адмовіліся везці туды хлопца. Таксама Анечка дадае, што аплачвала найлепшага адваката для ахвяры, які працаваў фактычна супраць яе жаніха. А яшчэ, што выплаціла сваякам пацярпелага больш за $39 тысяч.
Дзяўчына піша, быццам у судзе бацькі Андрэя патрабавалі ад яе мільён даляраў. «Пры гэтым штодня на працягу чатырох месяцаў мне жадаюць смерці. Пасля апошняга пасяджэння да мяне падышла адвакат пацярпелага і з ухмылкай сказала: «Дзяўчынка, я ведаю, што ў цябе ёсць грошы. Плаці, ты ведаеш, што трэба зрабіць». Я дапамагала і аплачвала ўсё, што ў частцы аперацый і дапамогі хлопцу. Але запыты звяліся зусім да іншага».
Тым часам знаёмыя Андрэя ў сацсетках распаўсюджваюць абвестку з інфармацыяй пра збор грошай на лячэнне і рэабілітацыю хлопца — там пазначана, што неабходна больш за 322 тысячы еўра.
Мяркуючы па сацыяльных сетках Андрэя, ён скончыў Беларускую дзяржаўную акадэмію сувязі, а яшчэ любіў наведваць начныя клубы.
У гадавіну заручын пары блогераў, 12 ліпеня, Сярогу прысудзілі 5,5 года зняволення.
Анечка ж апраўдваецца перад падпісчыкамі за сэксуальныя фотаздымкі ды вясёлыя відэа, якія выкладвала падчас асабістай драмы: «Мой блог — гэта ўсё маё жыццё, якое мы будавалі разам з Сярожам. І гэта мой заробак. Калі б я сышла, я б не змагла аплачваць рахункі, аперацыі, не магла б аказваць матэрыяльную дапамогу».
Свецкае жыццё Дар’і Шманай: дні нараджэння дзяцей Кіркорава і Comedy Club4
Каментары