Паэтычная серыя «Брукаванка» папоўнілася зборнікам вершаў Віктара Слінкі «Ліставанне». Гэта чацвёртая кніга паэта і першае выбранае, што падводзіць пэўныя вынікі папярэдняму творчаму этапу аўтара, піша bellit.info.
«Ліставанне» — гэта не проста выбраныя вершы. Гэта кніга, якая дазваляе ўбачыць яшчэ аднаго недаацэненага беларускага паэта апошніх дзесяцігоддзяў. Паэта, чый аўтарытэт у літаратурным асяроддзі значна перавышае яго вядомасць шырокаму чытачу.
«…Віктар Слінка выглядае, бадай, самым паслядоўным прыхільнікам таго кірунку, які адкрыў Алесь Разанаў. Найперш гэта датычыць версэта. Але Слінка не капіюе Разанава. Ён пераняў галоўнае — разуменне свабоднага верша як формы канцэнтраванага мыслення. Там, дзе Разанаў імкнецца да філасофскай формулы, Слінка пакідае больш месца для лірычнай інтанацыі і чалавечага пачуцця», — гаворыцца ў рэцэнзіі на кнігу.
Пазбягаю людзей.
Пазбягаю гутарак, цікаўных позіркаў.
Пазбягаю шумных вечарын.
Пазбягаю адзіноты.
Іду па вуліцы, мяняю кірунак, іду
разам з людзьмі і асобна ад
людзей і раптам спыняюся.
Ішоў дождж — як раз той, які
стукаўся ў маё вакно і якому я
не адчыніў, — ішоў дождж і
пакінуў лужыны.
Я паглядзеў у ваду.
Хто гэта?
Я так доўга пазбягаў з ім сустрэчы…
Віктар Слінка (Слінко) нарадзіўся 4 чэрвеня 1972 году ў в. Козікі Івацэвіцкага раёна. Вершы піша з пятнаццаці гадоў. Друкуецца ў беларускіх газетах і часопісах. Лаўрэат літаратурнай прэміі Таварыства вольных літаратараў «Гліняны Вялес» за кнігу «Штольні вясны», прэміі часопіса «Дзеяслоў» і «Залаты апостраф» за найлепшую паэтычную публікацыю 2005 году.
Аўтар кніг паэзіі «Апошні снег» (1995), «Штольні вясны»(2001), «Арахна» (2011), «Ліставанне» (2026).
Раней у выдавецкая ініцыятыва «Полацкае ляда» выпусціла ў кніжнай серыі «Брукаванка» кнігі Юрыя Гуменюка, Сяргея Патаранскага і Янкі Лайкова.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі1
Каментары