«Шрэк Трэці»
У трэцяй частцы гумарны волат-людажэр шукае караля Артура і прадухіляе дзяржаўны пераварот.
Шрэк Трэці (Shrek the Third)
ЗША, 2007, каляровы, 90 хв.
Рэжысэры: Крыс Мілер, Раман Хай
Жанр: Анімацыйныя камэдыйна-казачныя прыгоды
Адзнака: 7,5 (з 10)
Пасьля сьмерці цесьця-жабы Шрэк мусіць насьледаваць каралеўства. Але зялёнаму волату гэта не падабаецца, бо давядзецца разьвітацца з родным балотам. Разам в Восьлікам і Катом ён адпраўляецца на пошукі сапраўднага караля… Артура. А ў каралеўстве Фіёны малімонны сын фэі склікае армію зь ведзьмаў, злых дрэваў дый Безгаловага коньніка – і зьдзяйсьняе дзяржаўны пераварот. Фіёна ўзначальвае партызанскую барацьбу…
Трэцяя частка “Шрэку” не згубіла свайго зубастага гумарнога імпэту – і працягвае бадзёра-парадыйныя кпіны над казкамі й сучаснымі фільмамі. Кароль Артур – герой-дахадзяга, якога ўсе шпыняюць у Чароўнай школе (бедны-бедны Хогвардз ад Гары Потэра!), Папялушка пакутвае на нэрвовае мыцьцё падлогі, Сонная прыгажуня (з баявога атраду) валіцца пад ногі ворагам, а каралева-ўдава мае звычкі патаемнае каратыскі, якая прабівае галавою муры.
Сьмерць караля-жабкі з шматкроць вываленым языком і вырачанымі вачыма – дзікунскі й дасьціпны фарс, а чараўнік Мэрлін, які пакутуе на навязьлівую псыхатэрапію і сам зьехаў з глузду – гэта нешта.
“Псыхатэрапія” – увогуле, грае ў карціне не апошнюю ролю. Злы прынц Чамінг, ашалелы ад сваіх пекных валосаў і музычных здольнасьцяў (бяздарна-казьліных), – выступае ў ролі антытэрапэўта Гітлера, які спакушае казачных лузэраў на дзяржаўны пераварот. Прынц Артур – добры псыхатэрапэўт, які вучыць злыдняў прымаць сябе такімі, як ёсьць.
Гэтая парада спатрэбіцца ўсім героям: Кот і Восьлік будуць адыходзіць ад траўмы пасьля абмену целамі ("дзякуй" Мэрліну!), а Шрэк і Фіёна прызвычаіваюцца быць бацькамі.
Неўзабаве мусіць зьявіцца й чацьвёрты “Шрэк”.
Цяпер чытаюць
Сусветная зорка Джэйсан Дэрула заехаў у Беларусь. Прэм’ер Турчын вадзіў яго па Доме ўрада8
Каментары