«Šrek Treci»
U treciaj častcy humarny vołat-ludažer šukaje karala Artura i praduchilaje dziaržaŭny pieravarot.
Šrek Treci (Shrek the Third)
ZŠA, 2007, kalarovy, 90 chv.
Režysery: Krys Miler, Raman Chaj
Žanr: Animacyjnyja kamedyjna-kazačnyja pryhody
Adznaka: 7,5 (z 10)
Paśla śmierci cieścia-žaby Šrek musić naśledavać karaleŭstva. Ale zialonamu vołatu heta nie padabajecca, bo daviadziecca raźvitacca z rodnym bałotam. Razam v Voślikam i Katom jon adpraŭlajecca na pošuki sapraŭdnaha karala… Artura. A ŭ karaleŭstvie Fijony malimonny syn fei sklikaje armiju ź viedźmaŭ, złych drevaŭ dyj Biezhałovaha końnika – i ździajśniaje dziaržaŭny pieravarot. Fijona ŭznačalvaje partyzanskuju baraćbu…
Treciaja častka “Šreku” nie zhubiła svajho zubastaha humarnoha impetu – i praciahvaje badziora-paradyjnyja kpiny nad kazkami j sučasnymi filmami. Karol Artur – hieroj-dachadziaha, jakoha ŭsie špyniajuć u Čaroŭnaj škole (biedny-biedny Chohvardz ad Hary Potera!), Papiałuška pakutvaje na nervovaje myćcio padłohi, Sonnaja pryhažunia (z bajavoha atradu) valicca pad nohi voraham, a karaleva-ŭdava maje zvyčki patajemnaje karatyski, jakaja prabivaje hałavoju mury.
Śmierć karala-žabki z šmatkroć vyvalenym jazykom i vyračanymi vačyma – dzikunski j daścipny fars, a čaraŭnik Merlin, jaki pakutuje na naviaźlivuju psychaterapiju i sam źjechaŭ z hłuzdu – heta niešta.
“Psychaterapija” – uvohule, hraje ŭ karcinie nie apošniuju rolu. Zły prync Čaminh, ašaleły ad svaich pieknych vałosaŭ i muzyčnych zdolnaściaŭ (biazdarna-kaźlinych), – vystupaje ŭ roli antyterapeŭta Hitlera, jaki spakušaje kazačnych łuzeraŭ na dziaržaŭny pieravarot. Prync Artur – dobry psychaterapeŭt, jaki vučyć złydniaŭ prymać siabie takimi, jak jość.
Hetaja parada spatrebicca ŭsim hierojam: Kot i Voślik buduć adychodzić ad traŭmy paśla abmienu ciełami ("dziakuj" Merlinu!), a Šrek i Fijona pryzvyčaivajucca być baćkami.
Nieŭzabavie musić źjavicca j čaćviorty “Šrek”.
Bližejšym časam buduć vyzvaleny bolš za 150 palitźniavolenych39
Kamientary