Biełaruski mikrabijolah Ihar Łukaševič, hadavaniec Instytutu mikrabijalohii i epidemijalohii ŭ Miensku, uznačalvaje hrupu navukoŭcaŭ va ŭniversytecie Meryłendu (ZŠA), jakaja stvaryła vakcynu suprać trascy Łasa. Jakoha-niebudź efektyŭnaha srodku suprać śmiarotna niebiaśpiečnaj chvaroby dahetul nie isnavała.
Ad trascy Łasa štohod pamirała trysta tysiač čałaviek, najbolš u Afrycy. Jak i ŭzbudžalniki vuhlika, vospy, trascy Ebała štam Łasa moža vykarystoŭvacca jak bijalahičnaja zbroja. Hetym tłumačycca asablivaja ŭvaha navukoŭcaŭ da jaho.
Hetaja chvaroba prajaŭlajecca jak haračka, ciahniecca niekalki tydniaŭ i rujnuje ŭsie ŭnutranyja orhany cieła. Jak i virusy Ebała ci SARS, Łasa raspaŭsiudžvajecca praz pavietra. Dahetul efektyŭnaj vakcyny suprać Łasa nie isnavała.
Mikrabijolah Ihar Łukaševič pačaŭ vyvučać zachvorvańnie bolš za 10 hod tamu, jašče ŭ Miensku, padčas pracy ŭ adnoj ź labaratoryjaŭ navukova-daśledčaha instytutu mikrabijalohii i epidemijalohii. Vyjezd Łukaševiča za miažu mieŭ vyklučna navukovuju matyvacyju. Praca ź virusami, stvareńnie składanaj jakasnaj vakcyny, u tym liku i suprać hrypu, patrabuje adpaviednych umovaŭ i vielizarnych finansavych układańniaŭ. Takoj bazy ŭ Biełarusi siońnia niama.
U Instytucie virusalohii Meryłendzkaha ŭniversytetu Iharu Łukaševiču ŭdałosia stvaryć hetak zvany kłon virusu Łasa. Pieravaha hetaj virusnaj madyfikacyi ŭ tym, što jana kapijuje chvarobu, ale nie vyklikaje jaje ŭ arhaniźmie taho, kamu zroblenaja pryščepka. U vyniku vakcynacyi adna pryščepka na ŭsio žyćcio vypracoŭvaje imunitet suprać chvaroby.
Vakcyna, zroblenaja na asnovie kłonu virusu, daje navukoŭcam mahčymaść raspačać kliničnyja vyprabavańni nad čałaviekam biez usialakaj ryzyki jahonaha infikavańnia. Papiarednija vyprabavańni na prymatach dy inšych žyviołach prynieśli pazytyŭny vynik.
Padrabiaznyja vyniki daśledavańniaŭ źmieščanyja hetymi dniami ŭ amerykanskim navukovym časopisie Journal of Virology.
Kamientary