Ctraŭsy šalona bajacca fotaŭspyšak. Zatoje jany stojka pieranosiać choład, tamu navat pry temperatury 0 hradusaŭ hulajuć na adkrytym pavietry.
Straŭsy pieraŭzyšli maje ŭjaŭleńni pra vialikich ptušak. Pamierami jany nahadvajuć kania. Straŭsinaje jajka kaštuje 43 tys. rubloŭ, ale, kažuć, jaječnia ź jaho ekvivalentnaja 16 jaječniam z kurynych jajek! Sa škarłupiny robiać samyja raznastajnyja suveniry, naprykład latarni. Samaje ž dziŭnaje na fermie — heta turysty, jakija lezuć da ptušak cieraz aharodžu, dražniać ich i vydzirajuć piory.
Straŭsinaja ferma Navasiołki-Łučaj na Pastaŭščynie — samaje znakamitaje miesca ŭ Biełarusi, dzie razvodziać straŭsaŭ. Tut taksama hadujuć śviniej i trusoŭ, a jašče vyrablajuć ekalahična čysty syr, kaŭbaski, chleb dy piva.
«Jak za hranicaj!» — vochkajuć turysty, uražanyja pryhažościu Pastaŭskaha dy Kamajskaha kaściołaŭ. Ksiandzy abiedźviuch bažnic robiać usio, kab pahłybić uražańni. U Kamajskim kaściole ksiondz Jacak z zadavalnieńniem pakazvaje skarby.
Ajciec Jacak maryć u nastupnym hodzie zrabić vystaŭku, pryśviečanuju paetu Kazimieru Svajaku, i vydać choć kolki asobnikaŭ jahonaj «Majoj liry». Kanstancin Stapovič (Kazimier Svajak) byŭ probaščam u Kamajskim kaściole. U nastupnym hodzie buduć 80-ja ŭhodki jahonaje śmierci. Praŭda, hrošaj na vydańnie knihi niama.
Pravasłaŭnaj carkvy ŭ Kamajach nikoli nie było, tamu razam z katalickim kryžam na mohiłkach ksiondz ustalavaŭ i pravasłaŭny.
U Kamajach buduć stvarać ahraharadok, u centry vioski aktyŭna dobraŭparadkujecca płošča, vysiakajucca drevy, viadziecca budaŭnictva.
U hałoŭnaj pastaŭskaj znakamitaści — pałacy Antonija Tyzenhaŭza — znachodzicca centralnaja rajonnaja bolnica. Niadaŭna była zroblena restaŭracyja budynku, hrošy na jakuju vydatkavała UNESCO. Ciapier u bolnicy dźvie zali adviedzieny pad muzej, ale abaviazkovaj umovaju jaho naviedańnia źjaŭlajecca prahlad filmu pra zdarovy ład žyćcia. Adnak i tut niadaŭna vyznačylisia turysty — nafarbavali vusny pamadaj skulpturnaj dziaŭčyncy, jakaja staić u dvary bolnicy. Bo pryhažość reža voka — «jak za hranicaj».
∎
Aŭtar dziakuje za arhanizacyju vandroŭki turystyčnaj firmie «Altus-plus» i ekskursavodu Nadziei Codavaj.
Kamientary