Park Avenue — novy sprečny prajekt u vodna-zialonym dyjamietry Minska

U Minsku na skryžavańni vulicy Pieršamajskaj i Pulichava žadajuć pabudavać trochpaviarchovy šmatfunkcyjanalny kulturna-zabaŭlalny centr.

Centr płanujecca ŭźvieści na miescy ciapierašniaha niepracoŭnaha fantana, kala vieładarožki i nabiarežnaj Śvisłačy. Hramadskija słuchańni pa prajekcie zabudovy adbylisia ŭčora, i žychary rajona tam nie chavali svajho abureńnia jaskravym prykładam «uščylnieńnia», jaki raśsiače vodna-zialony dyjamietra Minska.

Prajekt centra pad nazvaj Park Avenue raspracavała Minskaje biuro architektury i dyzajnu «Dyvidbud», jakoje zajmajecca prajektavańniem pryvatnych damoŭ i raspracoŭkaj dyzajnu interjeraŭ.

U partfolia kampanii, źmieščanym na sajcie, pakul adsutničajuć prajekty kštałtu centra Park Avenue. Infarmacyja pra ŭdzieł pryvatnaha pradpryjemstva «Dyvidbud» u prajektavańni centra Park Avenue taksama adsutničaje. Zakazčyk dyzajn-prajekta nie nazyvajecca.

Hramadska-zabaŭlalny kompleks Park Avenue maje składacca z troch pavierchaŭ ahulnaj płoščaj 2498 kvadratnych mietraŭ.

Zhodna z apisańniem prajekta, na pieršym paviersie budzie znachodzicca 5D-kinateatr, viełakaviarnia z krytaj stajankaj, prakat i servis vielisipiedaŭ. Druhi pavierch addaduć pad restaran ź letniaj terasaj, vystavačnyja paviljony, dehustacyjnyja zały. Na trecim paviersie naviedvalniki znojduć zabaŭlalnyja centry (jak padazrajuć žychary rajona, pad hetym eŭfiemizmam kryjecca čarhovaje kazino), spartyŭnuju zału i zału atrakcyjonaŭ.

Terytoryju vakoł centra płanujecca «kamfortna dobraŭparadkavać» i azielanić — ale tam i tak park vakoł.

Architekturny prajekt praduhledžvaje stvareńnie skulpturnaj hrupy «Handoła», jakaja «stanie vartym upryhožvańniem parka i słavutaściu horada Minska». Miž tym na tym miescy raniej byŭ fantan. Praŭda, hadoŭ kolki ŭžo ŭletku jaho nie ŭklučajuć. Ale na prystupkach, što terasami spuskajucca vakoł jaho, pa-raniejšamu ŭletku siadziać parački i koŭzajucca padletki na skiejtach.

Pryvabnaje apisańnie, vidavočna, maje słaby efiekt na miascovych žycharoŭ.

U žurnale zaŭvah i prapanovaŭ da prajekta «za» vykazaŭsia tolki adzin čałaviek. «Minsk stanovicca kłaakaj», «kateharyčna suprać!», «nie varta budavać mienavita tut», «vybrany ŭčastak nie adpaviadaje funkcyjanalnamu značeńniu dadzienaha abjekta», «heta prosta bluźnierstva», «budaŭnictva pahoršyć transpartnuju situacyju», «nie źniščajcie toje, što pabudavali 50 hadoŭ tamu» — takija zaŭvahi źmieščanyja ŭ žurnale.

Miascovaja žycharka pakazvaje na dom na rahu Pieršamajskaj i Pulichava — kali centr pabudujuć, jaje vokny buduć vychodzić na Park Avenue.

«Kali jaho pabudujuć, ja nie viedaju jak tut žyć!» — kaža jana. «U susiednim domie adkryli kramu „Jeŭraopt“ [vuł. Pulichava, 3 — NN], i tam ciapier nieviadoma što adbyvajecca na parkoŭcy. A zaraz jašče i heta chočuć usunuć. Čamu b nie pabudavać štości na miescy kafe ŭ parku Horkaha — jano zakinuta ciaham užo 6 hadoŭ? Čamu treba budavać mienavita tut?» — skardzicca žančyna. «Pajdu zaraz pisać skarhu, ale kolki nie pišy, ničoha nie stanie. „Babło“ ŭsio adno pieramoža», — kaža jana.

Arhumienty aŭtaraŭ idei — hetaja placoŭka ŭ centry horada z dobrym padjezdam moža davać vialikija hrošy, u tym liku i ŭ haradski biudžet.

Čamu nie na procilehłym bierazie Śvisłačy, na miescy ladaščaha stankabudaŭničaha zavoda imia Kirava? Bo tudy spadziajucca ŭrešcie znajści bahataha zabudoŭnika, zdolnaha pastavić ceły kompleks budynkaŭ adrazu.

Zaŭvahi i prapanovy pa prajekcie budaŭnictva šmatfunkcyjanalnaha kulturna-zabaŭlalnaha centra Park Avenue možna pakinuć u faje Administracyi Partyzanskaha rajona pa adrasie: vuł. Zacharava, 53. Zaŭvahi i prapanovy prymajucca da 28 studzienia 2013 hoda.

• 0
• 0
• 0
• 0
• 0
• 0
• 0
• 0