12 sakavika ŭviečary raspačaŭsia aficyjny vizit u Respubliku Biełaruś kardynała Pjetra Paralina, Dziaržaŭnaha Sakratara Jaho Śviataści Papy Franciška. Vatykanski ijerarch prybyŭ pa zaprašeńni dziaržaŭnych uładaŭ krainy.
Kardynał Pjetra Paralin prybyŭ u Nacyjanalny aeraport «Minsk» nie śpiecyjalnym, ale zvyčajnym rehularnym rejsam.
U aeraporcie Dziaržaŭnaha sakratara Jaho Śviataści pieršymi pryvitali Apostalski Nuncyj u Biełarusi arcybiskup Kłaŭdyjo Hudžeroci i Nadzvyčajny i Paŭnamocny Pasoł Respubliki Biełaruś pry Śviatym Pasadzie Siarhiej Alejnik.
Taksama na cyrymonii pryvitańnia vysokaha hościa z Vatykana prysutničali ŭsie ardynaryi Katalickaha Kaścioła ŭ našaj krainie: Mitrapalit Minska-Mahiloŭski arcybiskup Tadevuš Kandrusievič, biskup Hrodzienski Alaksandr Kaškievič, biskup Pinski Antoni Dziamjanka, biskup Viciebski Aleh Butkievič, a taksama dapamožny biskup Minska-Mahiloŭskaj archidyjacezii Juryj Kasabucki i dapamožny biskup Hrodzienskaj dyjacezii Juzaf Stanieŭski. Hreka-Katalickuju Carkvu pradstaŭlaŭ Apostalski vizitatar dla hreka-katolikaŭ Biełarusi archimandryt Siarhiej Hajek.
Vizit Dziaržaŭnaha Sakratara Papy Franciška ŭ Biełaruś ździajśniajecca pa zaprašeńni dziaržaŭnych uładaŭ krainy, tamu na cyrymonii pryvitańnia prysutničali pradstaŭniki ŭładaŭ: Nadzvyčajny i Paŭnamocny Pasoł Respubliki Biełaruś pry Śviatym Pasadzie Siarhiej Alejnik i namieśnik Ministra zamiežnych spraŭ Respubliki Biełaruś Alena Kupčyna.
Kardynała Pjetra Paralina tradycyjna pryvitali chlebam-sollu.
Taksama paśla prybyćcia ŭ Biełaruś kardynał parazmaŭlaŭ z žurnalistami. U pryvatnaści, ijerarch adznačyŭ, što jaho vizit siudy jak pradstaŭnika Śviatoha Ajca — heta pryznańnie Biełarusi, biełaruskaha naroda, Katalickaha Kaścioła ŭ Biełarusi z boku Apostalskaj Stalicy i Śviatoha Ajca.
Kažučy pra rolu Biełarusi dla vatykanskaj dypłamatyi, asabliva ŭ suviazi z padziejami va Ukrainie, kardynał nazvaŭ Biełaruś vielmi važnaj placoŭkaj dla vyrašeńnia ŭkrainskaha kryzisu. Dziaržaŭny Sakratar dadaŭ, što tut havorka idzie pierš za ŭsio pra minskija pieramovy i pahadnieńni. Pa słovach ijerarcha, Śviaty Pasad vielmi žadaje vyrašeńnia hetaha kryzisu, i Biełaruś adyhryvaje ŭ hetym nadzvyčaj vialikuju rolu.
13 sakavika Dziaržaŭny Sakratar Jaho Śviataści praviadzie šerah sustreč na samym vysokim uzroŭni, sustreniecca z kiraŭnictvam Pravasłaŭnaj Carkvy, a taksama aśviacić pieršy kamień novaha budynka Apostalskaj Nuncyjatury ŭ Minsku. Pradstaŭnik Śviatoha Pasadu atrymaje mahčymaść lepš paznać žyćcio Katalickaha Kaścioła ŭ Biełarusi i adnosiny pamiž dziaržavaj i Kaściołam.
Skiroŭvajučy ŭ Biełaruś svajho Dziaržaŭnaha Sakratara, Papa Francišak imkniecca vykazać hłybokuju pavahu da biełaruskaha naroda i praz svajho bližejšaha supracoŭnika źjadnacca ŭ malitvie ź biełaruskimi katolikami.
Dziaržaŭny Sakratar źjaŭlajecca hałoŭnym supracoŭnikam Papy ŭ spravie kiravańnia Paŭsiudnym Kaściołam i pradstaŭlaje ŭ peŭnych umovach asobu samoha Pantyfika.
Heta druhi padobny vizit u sučasnaj historyi Biełarusi: u 2008 h. krainu naviedvaŭ Dziaržaŭny Sakratar kardynał Tarčyzia Biertona.
Kardynał Pjetra Paralin budzie znachodzcca ŭ Biełarusi pa 15 sakavika.
Ciapier čytajuć
Advakat Dźmitryj Lepretar raskazaŭ pra biełyja plamy ŭ spravie ab terakcie ŭ mietro9
Kamientary