«Asteryks na Alimpijskich hulniach»
Čarhovyja pryhody halskich hierojaŭ.
Asteryks na Alimpijskich hulniach (Asterix aux jeux olympiques)
Francyja – Hišpanija – Niamieččyna – Italija – Belhija, 2008, kalarovy, 120 chv.
Režysery: Frederyk Farestje, Tama Łanhman
Roli vykonvajuć: Kłovis Karnijak, Žerar Depardjo, Alen Dełon, Benua Pulvarde, Vanesa Hieśler, Zinadzin Zidan, Michael Šumachier
Žanr: Kamedyja
Adznaka: 5 (z 10)
Volny hał Zakachaniks maryć ažanicca na hreckaj pryncesie Irynie. Ale na Irynu pakłaŭ voka syn Julija Cezara Brut. Kab sarvać niežadany šlub i dać Zakachaniksu šaniec, Iryna abviaščaje, što vyjdzie zamuž tolki za pieramožcu Alimpijskich hulniaŭ. Brut spadziajecca na pośpiech, ale ŭ Zakachaniksa najlepšyja nastaŭniki – Asteryks i Abeliks…
Papularnyja francuskija persanažy, jakija stalisia hierojami komiksaŭ, animacyi – i filmaŭ, čarhovy raz na vialikim ekranie. Paśla “Misii Kleapatra” i “Asteryksa i Abeliksa suprać Cezara” – heta treciaja stužka ź niepieramožnymi i paciešnymi hałami. Kłovis Karnijak źmianiŭ Krystyjana Kłaŭje u roli Asteryksa, a Žerar Depardjo zastaŭsia niaźmiennym Abeliksam.
Alen Dełon hraje samazakachanaha imperatara – i nieŭprykmiet ździekvajecca z svaich minułych karonnych rolaŭ (chto viedaje, acenić žart pra “Roka i jahonych bratoŭ”). Raduje hrymasami Benua Pulverdu ŭ roli prydurkavataha Bruta, jaki maryć atrucić Baćku.
Leapard hublaje plamy, dysk raźbivaje statui, imčacca šalonyja koni, kryčyć hratesknaja publika. A Zynadzin Zydan i Michael Šumachier udała pracujuć na epizodach.
Chacia stužka nabyła pašanoŭna-vialikabiudžetny “imperski” status (78 młn. eŭra), heta nie pieraškodziła zastacca “halskaj historyi” žyvoj, paciešnaj i miłaj.
Kamientary