Pretendent u deputaty ad «Biełaj Rusi»: «Darvaŭšysia da ŭłady, apazicyja adsiače ŭsim niazhodnym hałovy»
Vosieńniu ŭ Biełarusi adbuducca vybary ŭ pałatu pradstaŭnikoŭ. Praŭda, vybarami ŭsie papiarednija kampanii možna było nazvać tolki ŭmoŭna: 110 miescaŭ sa 110 zajmali asoby, vyznačanyja ŭładami, apazicyi ŭ parłamiencie niama.
Voś i ŭ hety raz pra svoj namier stać zakonatvorcami zajavili členy praŭładnaj «Biełaj Rusi», jakija praviali na vychodnych svoj schod u stalicy.
«My płanujem padtrymać našych pradstaŭnikoŭ va ŭsich 110 akruhach, — zajaviŭ staršynia arhanizacyi Alaksandr Radźkoŭ.- Padbor i abmierkavańnie kandydatur ŭžo pačalisia, pryčym dosyć intensiŭna».
Chto takija – tyja kandydaty ŭ deputaty ad «Biełaj Rusi»? Pieršy ź ich źjaviŭsia ŭ efiry telekanała «Biełaruś-1» — heta dacent Biełaruskaha dziaržaŭnaha piedahahičnaha ŭniviersiteta Valancin Staryčonak.
«Jašče zusim niadaŭna Valancin sam byŭ studentam, a siońnia rychtuje budučych piedahohaŭ. Aktyŭnaja žyćciovaja pazicyja pryviała jaho ŭ šerahi «Biełaj Rusi». Pryzvyčaiŭsia pracavać z addačaj, tamu źjaviłasia dumka pajści ŭ deputaty», — tak apisała jaho žurnalistka dziaržaŭnaha kanała.
Sam Valancin za tyja niekalki siekundaŭ, na jakija jaho puścili ŭ kadr, skazaŭ, što parłamientu patrebna nieabyjakavaja da palityki moładź, jakaja maje svaju «moładzievuju enerhiju».
My pašukali ŭ internecie, što saboj ujaŭlaje pieršy zajaŭleny kandydat u deputaty.
U internecie Staryčonak pazicyjanuje siabie jak palitołah.
«Nazirać za našymi «śviadomymi» z «apazicyi» – niepaŭtornaja asałoda, chacia hetaja asałoda i nie dla ludziej sa słabymi nervami», — piša Staryčonak.
«Bolej za ŭsio našyja «śviadomyja» havorać pra demakratyju. Adnak… nazirajučy za imi, znachodziš padabienstva ź jakabincami, jakija rubili hałovy ŭsim niazhodnym. Biezumoŭna, pryjšoŭšy da ŭłady, jany stanuć rubić hałovy svaim apanientam. Ci demakratyja heta? Nie. Heta tatalitaryzm», — razvažaje Staryčonak i vinavać «śviadomych» u zaniapadzie biełaruskaj movy.
«Śviadomyja» lubiać parazvažać pra zaniapad biełaruskaj movy i pra adkaznaść, jakuju nibyta za heta niasie ciapierašniaja ŭłada. Biezumoŭna, mienavita na ich (i ni na kim inšym!) lažyć adkaznaść za toje, što narod padzabyŭ svaju movu. Pradjavy, jakija kidajucca ŭładzie, – čarhovaja sproba śpichnuć na trecich adkaznaść za ŭłasnuju niazdolnaść samastojna vyvučyć movu».
Taksama Staryčonak raić «aŭtarytetam ad apazicyi» pačytać hłybokuju i razumnuju litaraturu.
«Mo ichni dyskurs stanie cikaviejšym, kali jon uzbahacicca idejami Rene Hienona ci kaliści modnaha Alistera Kroŭli. Tady ichnija teoryi napoŭniacca panyłaj mietafizikaj i nabuduć zahadkavaje i sumnaje hučańnie na fonie razvału Staroha śvietu i zaradžeńnia novaha eonu», — piša Staryčonak.
(Eon — paniaćcie ŭ staražytnahrečaskaj fiłasofii, jakoje abaznačaje žyćciovy šlach čałavieka).
My vyrašyli pacikavicca i pierapytać u imaviernaha deputata, čamu jon tak nienavidzić «śviadomych». Viadoma, što baćka Valancina – słynny biełaruski movaznaŭca, prafiesar Vasil Staryčonak, siońnia jon dekan fakulteta biełaruskaj i ruskaj fiłałohii ŭ tym ža BDPU imia Tanka.
Mo i svajho baćku Valancin ličyć zanadta «śviadomym»?
Adnak syn Vasila Dzianisaviča zajaviŭ žurnalistu «Našaj Nivy», što mieŭ na ŭvazie tych «śviadomych», «jakija vielmivielmi nieprymirenča staviacca da inšych idejaŭ».
«Ja nie mieŭ na ŭvazie ŭsich ludziej, jakija lubiać biełaruskuju movu, a mienavita tych, jakija vielmi niehatyŭna reahujuć na adekvatnyja dziejańni», — małazrazumieła vykazaŭsia Valancin i adznačyŭ, što heta ŭsiaho tolki mietafara.
Taksama Staryčonak zapeŭniŭ, što za «ruski śviet» jon nie vystupaje.
«Ja za biełaruski śviet, adnaznačna. Za suvierenitet z budavańniem prahmatyčnych adnosin u tym liku z Rasijaj. Było b biessensoŭna hetyja adnosiny razryvać ci sapsavać, taksama možna raźvivać adnosiny ź ES. Treba i z tymi, i z hetymi siabravać, ja miarkuju», — skazaŭ Staryčonak.
Što da svaich płanaŭ stać deputatam, Valancin kaža, što pra heta pakul rana kazać. Maŭlaŭ, žurnalistka «Biełaruś-1» štości nie tak zrazumieła.
Naprykancy razmovy Valancin pasprabavaŭ patłumačyć svaje słovy pra «zaradžeńnie novaha eonu», skazaŭšy, što było b niabłaha, kab «apazicyjnyja idei, taja ž «Naša Niva», kab jana była fundziravana niejkaj fiłasofijaj, budź to francuzskaja ci jakaja jašče. Možna na Rene Hienona abapiracca, nie istotna».
«U dvuch słovach tut nie skažaš», — reziumavaŭ Staryčonak.
Ciapier čytajuć
Pamiatajecie čynoŭnika, jakoha kreatyŭna admazali ad zabojstva čałavieka na palavańni? Jon admazaŭsia znoŭ7
Kamientary