Adzin ź fihurantaŭ «spravy 17» raspavioŭ, što pieradavaŭ skrynki ź psichatropami aŭtobusami Maskva—Minsk

Na pracesie pa spravie ab raspaŭsiudžvańni narkotykaŭ, jaki prachodzić u Minharsudzie, praciahvajecca dopyt abvinavačanych. Jaho detali pieradaje ahienctva BiełaPAN.

3 sakavika davaŭ pakazańni Marat Bahiel, jaki abvinavačvajecca ŭ vyrabie, raspaŭsiudžvańni i pieravozcy narkotykaŭ u składzie arhanizavanaj złačynnaj hrupy. Apošnija hady Bahiel žyŭ u Maskvie. Jon staŭ pieršym abvinavačanym, jaki daje pakazańni ŭ sudzie, jaho dopyt pačaŭsia 2 sakavika.

Na siońniašnim pasiadžeńni Bahiel raspavioŭ, što pieradavaŭ skrynki ź psichatropami rejsavymi aŭtobusami Maskva — Minsk. Padčas dopytu vyśvietliłasia, što ŭ materyjałach spravy Bahiel fihuruje i pad inšym proźviščam — Akapian. Abvinavačany admoviŭsia adkazać, čym možna rastłumačyć hetaje razychodžańnie.

Pavodle słoŭ padsudnaha, da arhanizavanaj złačynnaj hrupy (AZH) pa raspaŭsiudžvańni narkotykaŭ jon dałučyŭsia prykładna ŭ kancy 2013 hoda. Uvieś nastupny hod da zatrymańnia (4 śniežnia 2014 hoda) zajmaŭsia zakładkami, pieravoziŭ zabaronienyja rečyvy, pieradavaŭ skrynki z Rasii ŭ Biełaruś. Jon uspomniŭ pra 40 takich pasyłak. Na adnu ź ich Bahiel atrymaŭ supravadžalnyja dakumienty, ź jakich vynikała, što ŭ skryniach znachodzicca raślina padbieł. Pakolki na rasijska-biełaruskaj miažy niama kantrolu, narkotyki, jakija pieravozilisia ŭ aŭtobusach Maskva — Minsk, bieśpieraškodna traplali ŭ Biełaruś. Pavodle słoŭ abvinavačanaha, byli vypadki, kali jon sam dastaŭlaŭ zabaronienyja rečyvy na terytoryju Biełarusi — pakidaŭ skrutki niepadalok ad miažy.

Marat Bahiel miarkuje, što znojdzienyja padčas vobysku ŭ kvatery padsudnaj Aliny Cierahiery narkotyki i jość adna ź jaho pieradač. 23-hadovaja dziaŭčyna była zatrymanaja rabotnikami pravaachoŭnych orhanaŭ u červieni 2014 hoda, pa miescy jaje žycharstva było kanfiskavana niekalki kiłahramaŭ zabaronienych rečyvaŭ. Cierahiera taksama prachodzić abvinavačanaj pa «spravie siamnaccaci». Z abvinavačańnia vynikaje, što mienavita jana była kiraŭnikom strukturnaha padraździaleńnia nielehalnaha biźniesu ŭ Minsku. Sama padsudnaja pryznaje siabie vinavataj u vyrabie, raspaŭsiudžvańni i pieravozcy narkotykaŭ, ale admaŭlaje, što pracavała ŭ składzie AZH.

Pavodle słoŭ Bahiela, u apošnija miesiacy pracy vyručka ŭ rasijskich filijałach rasła. Tak, kali ŭ vieraśni 2014 hoda ŭ kasie było 2,5 młn. rasijskich rubloŭ (pryblizna 64 tysiač dalaraŭ), a ŭ kastryčniku — 3,8 młn. rasijskich rubloŭ, to ŭ listapadzie — užo 4 młn. rasijskich rubloŭ. Abvinavačany rastłumačyŭ, što kožny miesiac jon atrymlivaŭ 5% ad prybytku. Za try miesiacy atrymlivajecca pryblizna 12 tysiač dołaraŭ.

Padčas dopytu Bahiel admaŭlaŭsia adkazvać na šmatlikija pytańni abaroncaŭ. Pavodle słoŭ advakata Kanstancina Viluhi (hałoŭnaha fihuranta spravy) viadoma, što Bahiel napisaŭ čatyry jaŭki z pakajańniem, dzie pa-roznamu vykładzienyja abstaviny zdareńnia. Adnak padsudny zajaviŭ, što nie budzie tłumačyć, čamu tak adbyłosia. Viadoma, što Bahiel zaklučyŭ dasudovaje pahadnieńnie — heta značyć, jon aktyŭna supracoŭničaŭ sa śledstvam.

Što da suviazi Viluhi z pravaachoŭnymi orhanami, to Bahiel znoŭ paćvierdziŭ, što takija znajomstvy ŭ jaho byli. «Sa słoŭ Rybko (jašče adzin fihurant spravy Siarhiej Rybko zatrymany ŭ Rasii, ciapier vyrašajecca pytańnie ab jaho ekstradycyi ŭ Biełaruś) ja viedaju, što jany pry dapamozie ludziej z MUS ci KDB «zakryvali» niekaha z kankurentaŭ», — zajaviŭ padsudny.

Pavodle słoŭ Bahiela, padčas śledstva jamu prapanoŭvali apaznać supracoŭnikaŭ pravaachoŭnych orhanaŭ, jakija prachodziać abvinavačanymi pa spravie, ale jon admoviŭsia. «Nie budu tłumačyć čamu. Heta maja sprava», — zajaviŭ padsudny.

Padčas dopytu jon vykazaŭ zdahadku, što prykładna šeść hadoŭ tamu jaho dapytvaŭ opierupaŭnavažany KDB Dźmitryj Vieracienski, jaki ciapier siadzić razam z Bahielem na łavie padsudnych. U toj čas byŭ zatrymany znajomy Bahiela Andrej Silin, i pravaachoŭniki cikavilisia, što viadoma Bahielu pra raspaŭsiudžvańnie narkotykaŭ u Navapołacku. Tady jaho adpuścili, ale Dźmitryja Vieracienskaha Bahiel zapomniŭ.

Advakat Bahiela nastojvała, kab na čas dopytu jaje padabaronnaha z zały suda vyvieli baćku Kanstancina Viluhi, jaki pryjšoŭ padtrymać syna. Pavodle słoŭ abaroncy, svajoj prysutnaściu Viluha-starejšy moža akazać niehatyŭny ŭpłyŭ na Marata Bahiela jaho pakazańni. Adnak sud hetaje chadajnictva adchiliŭ.

U sudzie abvieščany pierapynak da 10.30 4 sakavika. Čakajecca, što zaŭtra dopyt abvinavačanych praciahniecca.

• 0
• 0
• 0
• 0
• 0
• 0
• 0
• 0