Vada ŭ biełaruskich kałodziežach stanovicca płatnaj
U Barysaŭskim rajonie ź sielskimi žycharami pačali zaklučać damovy, pavodle jakich jany buduć apłačvać vadu, jakaja spažyvajecca z šachtavych kałodziežaŭ.
Infarmacyja ab zaklučeńni takich damovaŭ niekalki dzion tamu źjaviłasia na sajcie «Barysaŭvodakanał», na bałansie jakoha znachodzicca 566 šachtavych kałodziežaŭ. Paviedamlajecca, što «z ulikam vialikaj terytaryjalnaj raźjadnanaści» damovy buduć zaklučacca pastupova.
Jak raspaviała Naviny.by načalnik abanienckaha adździeła «Barysaŭvodakanał» Julija Stojčava, novaŭviadzieńnie datyčycca kałodziežaŭ, jakija znachodziacca na bałansie «Vodakanała» i absłuhoŭvańniem jakich zajmajecca pradpryjemstva — takija krynicy raźmieščany na vulicach i raźličany na niekalki damoŭ.
Pavodle słoŭ śpiecyjalista, spahnańnie apłaty za karystańnie kałodziežami stała mahčymym paśla pryniaćcia rašeńnia Minabłvykankama № 304, jakoje vyznačyła normy spažyvańnia vady dla žycharoŭ pryvatnych damoŭ, nie padłučanych da centralnaha vodazabieśpiačeńnia. Dakumient ustupiŭ u siłu ŭ kancy kastryčnika minułaha hoda, a ŭ sakaviku hetaha ŭ rajonie pačali zaklučać damovy.
Norma spažyvańnia vady z kałodzieža składaje 30 litraŭ u sutki na čałavieka. Sielskija žychary pavinny apłačvać jaje pa subsidavanym taryfie — 2790 rubloŭ za kubičny mietr.
Ličyć abjomy vypitaj z kałodzieža vady, viadoma, nichto nie budzie, ale vystaŭlać rachunki za vadu buduć mienavita pa hetym narmatyvie.
Takim čynam, siamja z čatyroch čałaviek, naprykład, u sakaviku zapłaciła b za vadu kala 10 400 rubloŭ: 30 litraŭ u dzień pamnažajem na čatyry (členy siamji), a zatym na 31 (dzion u miesiacy) — atrymlivajecca 3720 litraŭ ci 3,72 kubamietra, jakija treba pamnožyć na subsidavany taryf.
U svaju čarhu sielskija žychary zmohuć pradjaŭlać pretenzii da jakaści vady i pakidać zajaŭki na ačystku kałodziežaŭ, dadała Julija Stojčava.
Za karystańnie kałodziežami, raźmieščanymi na ŭłasnym padvorku, płacić nie pryjdziecca, ale čyścić ich viaskoŭcy pavinny za svoj košt, adznačyła śpiecyjalist.
U Ministerstvie žyllova-kamunalnaj haspadarki Naviny.by rastłumačyli, što zakanadaŭča «vodakanały» nie abaviazany brać płatu ź miascovych žycharoŭ za karystańnie šachtavymi kałodziežami, adnak heta i nie zabaroniena.
«U barysaŭskaha «Vodakanała» jość na bałansie hetyja šachtavyja kałodziežy, jość normy pa ich utrymańni — kolki razoŭ ich treba čyścić, farbavać i h.d. U ramkach prapanovy barysaŭski «Vodakanał», ja tak razumieju, prapanuje hramadzianam zaklučyć dahavor na ŭtrymańnie hetych kałodziežaŭ i, adpaviedna, ich absłuhoŭvać», - raspavioŭ načalnik upraŭleńnia pa pracy sa ŚMI i zvarotami hramadzian Minžyłkamhasa Hienadź Akściłovič.
Uviadzieńnie płaty za karystańnie kałodziežami, pavodle jaho słoŭ, dazvalaje «vodakanałam» skaračać vydatki na absłuhoŭvańnie. «Nakolki ja viedaju, takaja praktyka raspaŭsiudžana ŭ Mahiloŭskaj vobłaści», - dadaŭ śpiecyjalist.
Siarod inšych varyjantaŭ źnižeńnia vydatkaŭ mahčymaja, naprykład, pieradača kałodzieža žycharu, jaki budzie absłuhoŭvać jaho samastojna.
U Mahiloŭskaj vobłaści, sapraŭdy, šyroka raspaŭsiudžanaja praktyka źbirańnia płaty za karystańnie kałodziežami. Pa słovach načalnika ŭpraŭleńnia žyllova-kamunalnaj haspadarki Mahiloŭskaha abłvykankama Siarhieja Vaškieviča, taki padychod ŭkaraniaŭsia ŭ rehijonie apošnija niekalki hadoŭ.
«U zakonie ab pitnym vodazabieśpiačeńni praduhledžany centralizavanyja i niecentralizavanaha krynicy vodazabieśpiačeńnia. Pasłuhi vodazabieśpiačeńnia datujucca dziaržavaj. Dla taho kab atrymać datacyju, my pavinny pasłuhu kamuści akazać, tamu što finansujem pad abjomy, - rastłumačyŭ Siarhiej Vaškievič. - U nas hady dva-try tamu była masavaja pieradača hetych kałodziežaŭ (na bałans «vodakanała».) biez krynic finansavańnia. Paśla hetaha ŭnieśli źmieny ŭ narmatyŭnuju dakumientacyju ab tym, što šachtavyja kałodziežy taksama źjaŭlajucca vodazabieśpiačeńniem. Tamu my i ŭviali hetuju płatu».
Rašeńniami rajvykankamaŭ byli ŭstalavanyja normy spažyvańnia vady, paśla čaho zaklučalisia damovy z nasielnictvam. Vadu sielskija žychary apłačvajuć pa subsidavanym taryfie.
«Skarhaŭ było šmat, — pryznaje načalnik upraŭleńnia ŽKH. — Tłumačyć deputackim korpusam, sielsavietami. Ludzi niejak pryvykli, što histaryčna vadu brali, ale siońnia hetaje miesca ŭsio roŭna patrabuje ŭkładańnia srodkaŭ u ramont».
Ciapier čytajuć
Pamiatajecie vypusknika instytuta FSB, jaki raskatvaŭ pa Hrodnie sa ściaham Navarosii? Ciapier jon staŭ varšaŭskim biznesmienam29
Kamientary